Иргэдийн эрх ашгийг зөрчиж чанарын доголдолтой барилга барьсаар байгаа компаниудын талаар холбогдох төрийн байгууллагуудад гомдол гаргадаг хэдий ч  тодорхой үр дүнд хүрдэггүй тул хэвлэл мэдээллийн байгууллагаар дамжуулж эрх бүхий албан тушаалтны сонорт хүргэхийг эрмэлзэх болсон. Иймээс энэ удаагийн сурвалжлагаа мөн иргэдийн санал, хүсэлтийн дагуу бэлтгэлээ.

Хамгийн их санал авсан Богд Ар хороолол

           2013 онд Нийслэлийн мэргэжлийн хяналтын газартиргэдээс хамгийн их гомдол,санал ирүүлсэн байгууламжаар Баянгол дүүргийн I хороонд байрлалтай “Богд Ар” хороолол, Эко констракшны барилгууд “шалгарав”.
Нийслэлийн мэргэжлийн хяналтын газраас “Богд Ар” хорооллын нийт 17 барилгад шалгалт хийхэд  ашиглалт, чанарын шаардлага хангахгүй байгаа зөрчлүүдийн 53 орчим хувийг  барилгын дээвэр, 47 хувийг нь цэвэр усны шугам сүлжээ, агаар сэлгэлт, цахилгаан шугам сүлжээний асуудал эзэлсэн байна.

      Эдгээр барилга байгууламжийн инженерийн шугам сүлжээ, дээврийн засварын ажилд хэрэглэсэн материалууд нь чанарын шаардлага хангаагүйгээс гадна тухайн ажлыг гүйцэтгэхдээ технологийн алдаа гаргаснаас ашиглалт, эдэлгээний хугацаанаас өмнө гэмтэл согог гарсан байжээ. Тухайлбал,
хосолмол хийцлэлтэй барилгын гадна хашлага хийцийн дулаан алдагдал, темпуратурын зөрүү, өргийн суулт зэргээс шалтгаалан ханын өрөг /блок/ хэв гажилтад орж эвдрэл гэмтлүүд нь гарсан байна. Эдгээрээс шалтгаалж хана болон цутгамал хучилтад ан цав үүсчээ.

Мөн барилгуудын дээвэрт чанаргүй материал хэрэглэснээс гадаргуу нь  хөндийрсөн, ус нэвчин гоожсон, хар цаас хагарч гэмтсэн, хучлагын хэсгээр ус хавж гүйсэн байна.
Анх тус дээврийг 10 жилийн баталгаатай гэж байсан ч 2009 онд ашиглалтанд орсноос хойш ердөө дөрвөн жилийн дараа ашиглалтын шаардлагыг хангахааргүй болжээ.

Бохирын үнэрт “дарлагдсан” Цэлмэг хотхон

           Хан-Уул дүүрэгт оршдог “Цэлмэг” хотхонд орчны бохирдлоос болж өвчлөл газар авсан гэх мэдээлэл сүүлийн үед гарах болсон. Уг хотхоныг
төв зам дагуу Хатан туулын эрэг дээр Богд хан уулын хормойд, Байгалийн эрүүл цэвэр агаар, дуу чимээ багатай, хотын А зэрэглэлийн бүсэд байршдаг хэмээн сурталчилж байсан ч “Харгиа” цэвэрлэх байгууламжтай хаяа залгадаг учир тэндэхийн оршин суугчид цэвэр цэнгэг агаарт бус бохирын үнэрт дарагдаж сууна.

        Цэлмэг хотхоныг хятадын хөрөнгө оруулалттай Меритон компани барьсан бөгөөд оршин суугчидтай нь очиж уулзахад барилгын чанарт ихээхэн сэтгэл дундуур байгаа тухайгаа хэлж байсан юм.

“Цэвэрлэх байгууламжийн эхүүн, өмхий үнэр энэ орчимд нэлэнхүйдээ тархдаг. Дээрээс нь энэ байрны сантекникийн холболт буруу хийгдсэн, ашигласан хоолой нь чанарын шаардлага хангахааргүй барилгын 00-ийн өрөөнөөс дандаа өмхий үнэртдэг. Манайх энд жилийн өмнө нүүж ирээд цуурсан таазыг нь засвар хийж янзалсан ч одоо эргээд цууралт өгөөд байгаа. Барилга нь чанаргүй болохоор эндэхийн айлууд байраа эргүүлээд зарчихдаг. Манай байр л гэхэд 4-5 хүний гар дамжсан юм билээ. Одоо эргүүлээд заръя гэсэн ч зээлээр авсан учраас чадахгүй эхүүн үнэртэй, чийг даасан байранд гүрийгээд л амьдарч байна” гэсэн юм. Мөн Цэлмэг хотхоны оршин суугчдын хэлж байгаагаар зарим айл орон байраа зарж, солих гэхээр авах хүн ч олдохгүй, бага насны хүүхдүүднь харшилтай болж,бие дээр янз бүрийн тууралт гарах болжээ. Хуулиараа бол химийн хортой бодистой харилцдаг байгууллагын орчимд 500 метрээс дотогш зайд орон сууцны барилга барихыг хориглодогтөдийгүй орон сууцны хороолол төлөвлөхдөө эхлээд газрын гадарга, ус, хөрс шороонд нь шинжилгээ хийх ёстой байдаг. Гэтэл Цэлмэг хотхоныг барьж байгуулахдаа холбогдох төрийн болон мэргэжлийн байгууллагын хяналт шинжилгээний хаагуур өнгөрсөн бэ гэдэг нь сонирхолтой. Зоосны нүхээр харж бүхнийг шийддэг эрх мэдэлтнүүдэд иргэдийн эрүүл мэнд огтхон ч хамаагүй  гэдгийг Меритон компаний Цэлмэг хотхон харууллаа.

Сэтгүүлч Б.Цолмонтуяа