Монгол улсын Засгийн газраас орон сууцны ипотекийн зээлийн хөтөлбөрийг баталж хэрэгжүүлээд хагас жилийн хугацаа өнгөрлөө. Энэ хуагцаанд 16741 иргэний хүсэлтийг бүрэн шийдвэрлэж, орон сууцны ипотекийн 474.2 тэрбум төгрөгийн зээлийг дахин санхүүжүүлж, орон сууцны зээлийн хүүг 8 хувьд шилжүүлсэнбол 12682 иргэнд 732.6 тэрбум төгрөгийн орон сууцны ипотекийн зээл шинээр олгосон байна.

         Сүүлийн үед иргэдийн дунд орон сууцны зээл цаашид үргэлжлэхгүй зогсоно гэсэн яриа гараад байгаа ч БХБЯамнаас албан ёсоор энэхүү хөтөлбөр хэвийн үргэлжлэнэ гэж мэдэгдсэн. Харин саяхан орон сууцны ипотекийн зээлийн хоёрдугаар үе шатыг үргэлжүүлэхээр нэгэн гэрээг Монголын ипотекийн корпораци байгууллаа.

              Монголын ипотекийн корпораци болон “МИК Актив нэг” ХХК арилжааны есөн банктай хамтран ажиллах гэрээнд гарын үсэг зурлаа. Өнгөрсөн хугацаанд МИК, Монголбанк, арилжааны банкуудын хамтын ажиллагааны үр дүнд иргэдэд жилийн найман хувийн хүүтэй ипотекийн зээлийг олгосон. Энэ удаад “МИК” болон “МИК Актив нэг” ХХК, арилжааны банкуудтай орон сууцны зээлийн санхүүжилтийн эх үүсвэрийг хөрөнгийн зах зээлээс бүрдүүлэх зорилгоор хамтран ажиллахаар болж байна. Өөрөөр хэлбэл, өнгөрсөн хугацаанд иргэдэд олгосон орон сууцны зээлийн багцыг үнэт цаасжуулах ажил ийнхүү албан ёсоор эхэлж байгаа юм. Энэ дагуу эхний ээлжийн зээлийн багцыг үнэт цаасжуулах ажлын 90 хувийг Монголбанк хариуцан ажиллаж байгаа бөгөөд үлдсэн 10 хувийг арилжааны банкууд худалдан авч,  энэ нь нийт 322.9 тэрбум төгрөг болж байгаа юм.