Хөгжлийн бэрхшээлтэй болон ахмад настан, төрийн албан хаагчдад зориулсан хямд үнэтэй орон сууцны эхний ээлж ашиглалтанд орлоо гэснээс хойш 2 сар гаруй хугацаа өнгөрөв.  Засгийн газрын “Шинэ бүтээн байгуулалт” дунд хугацааны зорилтод хөтөлбөрийн хүрээнд Яармагийн дэнж дээр баригдаж буй Буянт-Ухаа хорооллын 567 айлын орон сууц эзнээ хүлээх болсон нь төрөөс энэ байранд хэнийг оруулахаа шийдэж чадаагүй байгаатай холбоотой. Төрийн орон сууц санхүүжилтын корпораци /ТОССК/  уг хороололд оршин суух хүсэлтэй иргэдийн саналыг хүлээн авч шалгуур үзүүлэлтүүдийг нь хангаж байгааг нягталсны эцэст Буянт-Ухаа хороолол эзэнтэй болох юм. Энэ хороолол нь зорилтот бүлгийхэнд зориулагдсан болохыг Засгийн газраас мэдээлж байсан. Зорилтот бүлэгт залуу гэр бүлүүд багтаж байгаа бөгөөд нийт байранд орох иргэдийн 70 хувийг эзлэх юм. Хэрэв байранд орох хүсэлтэй залуу гэр бүлийн тоо орон сууцны тооноос хэтэрвэл сугалаагаар шийдэхээр болсныг ТОССК албан ёсоор мэдэгдсэн билээ. Харин үлдсэн 30хувь нь ахмад настан, хөгжлийн бэрхшээлтэй иргэдэд зориулагджээ. Буянт-Ухаа хорооллын орон сууцны м²-ийн үнэ сая 280 мянга байхаар тогтоогдсон бөгөөд бусад зээлийн мөн адил иргэдээс урьдчилгаа 30 хувиа төлөхийг шаардаж байгаа юм. Түүнчлэн урьд өмнө нь орон сууцны зээлд хамрагдаж байгаагүй, нийгмийн даатгал 2 жилээс доошгүй хугацаанд төлсөн, өрхийн орлогын 45-аас доошгүй  хувиар зээлээ төлөх чадвартай байх гэх мэт шалгуур үзүүлэлтийг хангах хэрэгтэй аж. Одоогоор энэ шаардлагыг хангаж чадсан гэж үзсэн 9801 иргэн Буянт-Ухаа  хорооллын оршин суугч болох хүсэлтээ гаргажээ. ТОССК-оос эдгээр иргэдийн мэдүүлэг үнэн зөв болохыг сайтар нягталсны дараа орон сууцанд оруулах юм.  Мэдээж хэрэг энэ шалгалтыг ТОССК дангаараа хариуцан хийхгүй бөгөөд нийгмийн даатгалын газар, банк санхүүгийн байгууллага зэрэг холбогдох газруудтай хамтран хийж байгаа учраас багагүй хугацаа зарцуулж байгаа аж. Шалгалтын дүнг ирэх долоо хоногт олон нийтэд зарлахаар төлөвлөжээ. Энэ тухай бид цаг тухайд нь мэдээлэх болно.