Нийслэлийн авто замын сүлжээг өргөтгөх, зөв төлөвлөлттэй орчин үеийн тохилог гудамж, замуудыг бий болгох зорилгоор Засгийн газраас “Гудамж” төслийг өнгөрсөн оноос хэрэгжүүлж эхлэсэн билээ.
     Төслийн хүрээнд нийслэлийн авто замын 33 уулзварыг өргөтгөх бөгөөд “Өргөө” кино театрын өмнөх уулзвар, Саппорогийн аюулгүйн тойрог, 19-р хорооллын АПУ ХХК-ийн ар, Дарь-Эх Сансарын уулзварыг шинэчилж, ашиглалтанд оруулаад байгаа юм. “Гудамж” төслийнхөн бас нэгэн замыг шинэчлэх зорилгоор өнөөдөр тус замын орчинд амьдардаг иргэд, оршин суугчидтай уулзалт хийлээ. Энэ нь Сүхбаатар дүүргийн нутаг дэвсгэр дэх “Цэцэг” төвийн уулзвараас урагш Ерөнхийлөгчийн өвлийн ордон Төрийн тусгай хамгаалалттай газрын хашааг дайруулан Сөүлийн гудамж, “Баянгол” зочид буудлын арын замуудыг холбосон 0,45 км зам гаргах ажил юм.  Тус зам нь “Баянгол” зочид буудлын арын орон сууцны хороолол дундуур дайрч өнгөрөх учир ийнхүү иргэдээс санал асуулга авч байгаа  аж.
Сүхбаатар дүүргийн нэгдүгээр хорооны 1, 5, 33-р байрны иргэд санал асуулгад идэвхтэй оролцсон бөгөөд зам барих ажлыг тийм ч таатай хүлээж аваагүй юм.
   Харин “Гудамж” төслийнхөн Энхтайваны гүүрээс уруудан ирэх зам болоод Чингисийн өргөн чөлөө төв замын ажлын ачааллыг бууруулж, оршин суугчдын цаг зав, мөнгийг хэмнэх давуу тал олонтой зам байх талаар тайлбарлаж байсан. Хэрэв “Гудамж” төслийнхөн оршин суугчидтай зөвшилцөлд хүрч чадвал энэ зун “Цэцэг” төвөөс шууд Энхтайваны гүүр хүрэх нэгэн шинэ зам ашиглалтанд орох нь ээ.