Нийслэлийн удирдлагын зөвлөлийн ээлжилт хуралдаан өнөөдөр боллоо. Хуралдаанаар шалган бүртгэх товчоо болоод төлбөртэй зогсоолуудын асуудлууд, хот байгуулалт , менежментийн системийн тухай, нийслэл хот доторх ачаа тээвэрлэлтийг зохицуулах төсөл зэрэг асуудал хэлэлцсэний нэг нь барилгын хог хаягдлын үйлдвэртэй болох тухай байлаа.  Нийслэл хотод  хог боловсруулах үйлдвэр барьж байгуулах зайлшгүй шаардлага байгаа ч одоогийн байдлаар цаасны болон барилгын хог хаягдлын үйлдвэр барих нь нэн түрүүнд хийх ажилд тооцогдож байгаа юм.     
Иймд нийслэлийн Тохижилт, хог хаягдал удирдлагын хэлтэс хэд хэдэн судалгаа хийж, энэ чиглэлээр үйл ажиллагаа явуулах сонирхолтой аж ахуйн нэгжүүдийн дунд төслийн уралдаан зарласны эцэст нэгэн компанийг онцолж байгаагаа удирдлагууддаа танилцуулсан юм.  Энэ нь БНСУ-ын хөрөнгө оруулалттай “MSC ресурс” нэртэй компани бөгөөд өөрсдийн хөрөнгөөр барилгын хог хаягдлын үйлдвэрийг богино хугацаанд барьж босгох боломжтой байгаагаа илэрхийлж төсөл, тооцоогоо ирүүлсэн байна.  Барилгын хог хаягдлыг дахин боловсруулж, бүтээгдэхүүн үйлдвэрлэх зорилготой энэ үйлдвэр эхний ээлжинд дотоодод хараахан үйлдвэрлэж чадахгүй байгаа ханын болон замын плитаг хийхээр төлөвлөж байгаа аж. Түүнчлэн өөрийн үндсэн түүхий эд болох барилгын хог хаягдлаа нийслэл хотоос өөрсдөө татахаар зохицуулах гэж байгаа нь барилгын салбарынхны хувьд хогоо заавал төвлөрсөн цэгт хүргэдэг одоогийн журмаас “салах” таатай санал юм.
Харин энэ компаний зүгээс нийслэл хотоос 15 жилийн хугацаатайгаар газар эзэмшүүлэх, үйл ажиллагаандаа татварын тодорхой хувийн хөнгөлөлт эдлэх, үйлдвэрлэсэн бүтээгдэхүүний борлуулалтыг дэмжих гэсэн 3 төрлийн дэмжлэг авах хүсэлтэй байгаагаа илэрхийлжээ. Энэ нь бусад компаниудынхаас илүү боломжит санал гэж төслийг шалгаруулсан багийнхан ярьж байсан.
Өнөөдөр болсон хуралдаанаар нийслэлийн удирдлагууд барилгын хог хаягдлын үйлдвэрийн төсөлтэй илүү дэлгэрэнгүй танилцах хүсэлтэй байгаагаа илэрхийлж, цаашид  дэмжихээ мэдэгдлээ.