Тээврийн хэрэгслийн албан татвар, агаарын бохирдлын төлбөр, авто зам ашигласны төлбөр хураах ажил нийслэлийн хэмжээнд өнгөрсөн сарын 21-нээс  эхэлж одоогоор татвар, төлбөр хураалтын явц  40 хувьтай  байгаа аж. Ажлын эхний хэсэг ирэх сард дуусна.
Нийслэлийн Засаг даргын захирамжаар байгуулсан Татвар хураалтын төв комисс тээврийн Үндэсний Дата төвтэй хамтран авто тээврийн татвар, төлбөр,  торгуулийн мэдээлэл солилцох нэгдсэн системийг хэрэгжүүлэн программ боловсруулахаар болжээ. Энэхүү системд авто тээврийн хэрэгсэл болон эзэмшигчтэй холбоотой мэдээлэлд үндэслэн үйл ажиллагаа явуулдаг төрийн байгууллагууд нэгдэж,  дундын мэдээллийн сан үүсгэх юм. Өөрөөр хэлбэл Зам тээврийн яам, Татварын Ерөнхий газар, Замын хөдөлгөөний удирдлагын  төв, Авто тээврийн Үндэсний төв, Даатгал, Нийслэлийн Тээврийн газар, Цагдаагийн Ерөнхий газар зэрэг байгууллагуудын мэдээллийг нэтгэж дундын мэдээллийн сан үүсгэнэ. Ингэснээр тээврийн хэрэгсэл эзэмшигчийн бүртгэл сайжрахаас гадна иргэн зөвхөн torguuli.mn гэсэн цахим хуудаснаас татвар, замын төлбөр төлөлт, оношилгоо, даатгалын мэдээллээ бүрэн авах боломжтой болох төдийгүй иргэд өөрт ойр аль ч банкинд татвар, төлбөрөө төлөх боломжоор хангагдах юм.
 Цаашид авто тээврийн болон өөрөө явагч хэрэгслийн албан татвар, агаарын бохирдлын төлбөр, авто зам ашигласны төлбөрийг тухайн жилийн гуравдугаар сараас зургаадугаар сарын хороонд төлж барагдуулах бус шинэ системийн тусламжтайгаар  жилийн турш нээлттэй байхаар зохицуулах гэнэ. Харин тухайн жилдээ багтан татвар, төлбөрөө төлөөгүй тохиолдолд нэгдсэн мэдээллийн санд орсон бүртгэлийн дагуу тээврийн хэрэгсэл эзэмшигчид захиргааны хариуцлага тооцох юм.