“Барилга экспо-2014” үзэсгэлэн яармагийн хүрээнд зохион байгуулсан “Үл хөдлөх хөрөнгийн зах зээл” сэдэвт уулзалт өнөөдөр Мишээл төвд амжилттай явагдаж өндөрлөлөө.
       Уулзалтын зорилго нь үл хөдлөх хөрөнгө, барилгын салбарт бизнес эрхлэгчдэд зориулж  Монгол Улсын үл хөдлөх хөрөнгийн зах зээлийн чиг хандлага, тулгамдаж буй асуудал, хөрөнгө оруулалтын орчин ямар байгаа болон барилгын салбарт ногоон барилгын концепцийг хэрэгжүүлэх боломжийн талаар төсөл хариуцсан мэргэжилтэн, мэргэжлийн судалгааны байгууллагууд танилцуулга хийж, эдгээр асуудлын хүрээнд хэлэлцүүлэг зохион байгуулах явдал байлаа.
       “Үл хөдлөх хөрөнгийн зах зээл” сэдэвт уулзалт Барилгын Зөвлөгөө Мэдээллийн Төвийн Захирал Г.Батсүх үг хэлснээр эхэлж, ШУТИС-ын багш Б.Мөнхбаяр \Ногоон барилгын концепци\ сэдэвт илтгэлээ танилцуулсан.


Тэрээр илтгэлдээ Ногоон барилга нь хүний эрүүл мэнд болон хүрээлэн буй орчинд сөрөг нөлөөгүй, хүний амьдрах тав тухтай орчинг бүрдүүлсэн байх ёстойг онцлоод Монгол улс хүлэмжийн хийн ялгаруулалтаар дэлхийд эхний тавд жагсдаг, Улаанбаатар хот 240 хоног халаалт хэрэглэдэг хамгийн хүйтэн нийслэл тул үүнийг дагаад эрчим хүчний хэрэглээ маш өндөр. Тиймээс барилгажилтад эрчим хүчний хэмнэлт зайлшгүй шаардлагатай байгааг дурьдаж байв. Түүнчлэн барилгажилт эрчимжиж маш их барилга, орон сууц баригдаж байгаа ч орчиндоо халтай байгаа нь тогтвортой хөгжил биш гэдгийг сануулсан.
        Дараагийн илтгэгч “Мастер проперти” компаний ахлах судлаач Батзориг “Монгол Улсын үл хөдлөх хөрөнгийн зах зээлийн чиг хандлага” сэдвээр танилцуулга хийлээ.


Түүний илтгэлд дурьдсанаар Монгол улсын барилгын салбар нь ДНБ-ний 10 орчим хувийг бүрдүүлдэг, ойрын 10 жилд үл хөдлөх хөрөнгийн зах зээлд оруулах хөрөнгө оруулалтын хэмжээ жил тутам 15-40 хувиар нэмэгдэнэ гэсэн таамаглал дэвшүүлж байгаа аж. Мөн илтгэлдээ үл хөдлөх хөрөнгийн зах зээлд идэвхитэй үйл ажиллагаа явуулдаг аж ахуйн нэгжүүдийн тоон мэдээллийг дэлгэрэнгүй танилцуулаад, манай улсын үл хөдлөх хөрөнгийн зах зээлийн онцлог, энэхүү зах зээлд нөлөөлж буй хүчин зүйлүүдийн талаар тайлбар өгсөн юм.
       Уулзалтын төгсгөлийн илтгэл нь Хөрөнгө оруулалтын зөвлөх “UMC Аlpha” компаний Хөрөнгө оруулалт хариуцсан захирал С.Баясгалангийн \Орон сууцны зах зээлийн төлөв\ сэдвээр бэлтгэсэн танилцуулга байлаа.


Илтгэлээ орон сууцны зах зээлийн 2014 оны төлөв, барилгын салбарын хөрөнгө оруулалт, орон сууцны санхүүжилт, мэргэжилтний зөвлөмж гэсэн дэд сэдвүүдийн хүрээнд танилцуулсан. Тэрээр энэ онд маш олон тооны орон сууц шинээр ашиглалтанд орох боломж байгаа ч тэдгээрийг худалдан авах чадвартай иргэд байхгүй, эрэлт буурах хандлагатай байгааг дуулгаад валютын ханшийн өндөр өсөлтийн үед импортоос бүрэн хамааралтай манай орны барилгын салбар тогтвортой хөгжиж чадахгүйг онцоллоо. Мөн орон сууцны санхүүжилтын хувьд ипотекийн зээлийн эргэн төлөлт харьцангуй сайн байгаа ч энэ нь гадаад зах зээлээс хөрөнгө босгох хангалттай эх үүсвэр болж чадахгүй, хөрөнгө оруулалтын урсгал барилгаас өөр салбарыг сонирхож эхэлж байгаа гэлээ. Хөрөнгө оруулалтын орчны хувьд гадаадын орнууд Даатгалын сан, Хөрөнгө оруулалтын сан, Банк гэх мэтийн олон эх үүсвэрээс хөрөнгө оруулалт татах боломжтой байдаг бол манай орны хувьд ердөө Банкийг л хардаг. Харин өнөөдрийн эдийн засаг хүндхэн байгаа энэ нөхцөлд банкны салбар өөрөө өндөр эрсдэл дунд байгаа учир түүнд найдах хэрэггүй, гадаад зах зээлээс хөрөнгө оруулалт татах боломжийг судлах хэрэгтэйг  зөвлөв.
       Уулзалтын төгсгөлд оролцогчид маш чухал хэрэгцээтэй мэдээ мэдээллээр танилцуулга хийсэнд талархлаа илэрхийлээд өөрсдийн сонирхсон асуултанд хариулт авцгаасан.  
Ийнхүү барилга, үл хөдлөх хөрөнгийн салбарт үйл ажиллагаа эрхэлдэг аж ахуйн нэгж, байгууллагын удирдлага, мэргэжилтнүүд “Үл хөдлөх хөрөнгийн зах зээл” сэдвийн хүрээнд олон талын мэдээлэл сонсож, тулгамдаж байгаа асуудлаа хэлэлцэн нэг өдрийг үр дүнтэй өнгөрөөлөө.
 
Жич: Уулзалтан дээр танилцуусан илтгэлүүдийг дэлгэрэнгүй байдлаар сайтдаа оруулах болно.