Сэлэнгэ аймгийн Алтанбулаг сумын нутаг дэвсгэрт 500 га газрыг худалдааны чөлөөт бүс болгох тухай УИХ-ын тогтоол 2002 онд анх гарсан билээ. Түүнээс хойш Засгийн газраас тус бүс нутгийн хөгжлийн ерөнхий төлөвлөгөөг гаргах, зураг төслийг нь боловсруулах, техник эдийн засгийн үнэлгээг хийх зэрэг ажлуудыг шат дараалан хийсэн төдийгүй энэ онд дэд бүтцийн ажлыг нь бүрэн хийж дуусгасан байна.  Дэд бүтцийн ажилд  худалдааны чөлөөт бүсийн талбай байгуулах, авто зам , инженерийн шугам  сүлжээ тавих зэрэг ажлууд багтжээ. Ингэснээр Алтанбулаг худалдааны чөлөөт бүсэд төрөөс хийх ажил дуусч байгаа аж.
 Үүнтэй  холбогдуулан Алтанбулаг худалдааны чөлөөт бүсийн төвийг ирэх 6 сарын 22-нд албан ёсоор нээхээр шийдвэрлэжээ. 10 гаруй жилийн турш яригдаж байж сая албан ёсоор нээгдэх болсон худалдааны чөлөөт бүсийн талаар шинэхэн дарга Ч.Чимэдсүрэн,  Тамгын газрын дарга Т.Мөнхбат болон бусад ажилтнууд өнөөдөр сэтгүүлчдэд мэдээлэл хийлээ.
Ч.Чимэдсүрэн Алтанбулаг худалдааны чөлөөт бүсийн захирагчаар долоохон хоногийн өмнө томилогджээ. Хэдийгээр ажилтайгаа дөнгөж танилцаж байгаа ч Засгийн газраас өгсөн үүрэг даалгаврын дагуу тогтоосон хугацаанд худалдааны чөлөөт бүсийн нээлтийг хийхийг хичээж ажлахаа амлаж, ингэх боломж нь ч бүрдсэн болохыг хэлж байв.
 Алтанбулаг худалдааны чөлөөт бүсэд улсаас хийх ёстой дэд бүтцийн ажлууд бүгд хийгдсэн учир бүтээн байгуулалт өрнүүлэх саналыг хувийн хэвшлийнхэнд тавьж байгаа юм.  

Энэ бүс нутагт худалдаа эрхлэхэд төрөөс татварын тодорхой хөнгөлөлтүүдийг эдлэхээр зохицуулсан. Тухайлбал барааг хилийн чанадаас оруулахад импортын гаалийн нэмэгдсэн өртөгийн болоод онцгой албан татвар ногдуулдаггүй. Харин дотоодын барааг чөлөөт бүсэд оруулахад экспортын гаалийн татвартай бол түүнийг ногдуулж нэмэгдсэн өртөгийн албан татварыг буцаан олгохоор шийдсэн билээ.
 Түүнчлэн ОХУ-ын иргэд визгүйгээр тус бүс нутагт нэвтэрч худалдаа арилжаа хийж болох бол бусад орны иргэд Алтанбулаг  чөлөөт бүсэд шууд нэвтрэх тусгай ангилалын визээр орж, гарах ажээ. Манай орны иргэдийн хувьд гадаад паспортоо шалгуулан тус бүс нутагт чөлөөтэй нэвтрэх эрхтэй бөгөөд удаан хугацаагаар оршин сууж бизнес эрхлэх бол холбогдох газар хүсэлт гарган зөвшөөрөл авах хэрэгтэй гэнэ.
Одоогоор Алтанбулаг худалдааны чөлөөт бүсэд 4 давхар худалдааны төвийн байрыг барьж ашиглалтанд оруулахаар ажиллаж байгаа бөгөөд бүтээн байгуулалт өрнүүлэх хүсэлтэй компаниуд хүсэлтээ чөлөөтэй гаргах боломжтой аж.  
Мөн тус бүсийн шинэхэн захирагч зураг төслийн ажлыг дахин боловсруулахаар төлөвлөж байгаагаа дуулгасан.