Эх орондоо болон гадаадад ажиллаж амьдарч буй монгол иргэдийн эрхзүй, санхүүгийн боловсролын хөгжлийг дэмжих ажлыг үйл ажиллагааны чиглэл болгодог Далайн салхи нийгэмлэг  БХБЯ-ны захиалгаар барилгын салбарын мэргэжлийн боловсон хүчнийг бэлдэх, чанаржуулах зорилго бүхий сургалтуудыг 3 дахь жилдээ зохион байгуулж байна. Далайн салхи нийгэмлэг нь гадаад орнуудад зохиогдож байгаа сургалтуудад дотоодын боловсон хүчнүүдийг зуучлан сургалтанд хамруулдаг бөгөөд энэ оны эхний хагаст барилгын салбарын хувьд дөрвөн ч  сургалтыг зохион байгуулахаар төлөвлөжээ.
Үүнээс БНСУ-ын Инчон хотноо болох “Ус хангамж, бохир ус ариутгах татуургын системд нэвтрүүлж буй дэвшилтэд техник технологи” мөн тус хотноо болох “Дунд болон бага оврын дулаан хангамжийн эх үүсвэрийн дэвшилтэд технологи”сургалтанд хамрагдах хүсэлтэй иргэдийг 6 сарын 22-ныг хүртэл бүртгэж байгаа аж.
Түүнчлэн  “Бага дунд орлоготой иргэд, залуу гэр бүл, ахмад настан, хөгжлийн бэрхшээлтэй иргэдийг орон сууцжуулах хууль эрх зүйн орчин”, “Газар зохион байгуулалт”-ын мэргэжил дээшлүүүлэх сургалтанд ч   бүртгэж эхлээд байна.
Эдгээр сургалтын талаарх мэдээлэлийг Далайн салхи нийгэмлэгийн дэргэдэх Олон улсын мэргэжлийн хөгжлийн институтээс лавлаж болох бөгөөд “Бага дунд орлоготой иргэд, залуу гэр бүл, ахмад настан, хөгжлийн бэрхшээлтэй иргэдийг орон сууцжуулах хууль эрх зүйн орчин” сургалт 5-р сарын 25-наас 6-р сарын 1-ний хооронд болох юм. Энэхүү сургалтанд хамрагдснаар БНСУ-ын иргэдийг орон сууцжуулах бодлого, тус орны орон сууцны хөгжил  болон төлөвлөлт, барилгын аюулгүйн ажиллагааны талаар мэдэж авах боломжтой.
Харин “Газар зохион байгуулалт, түүний бодлого стратеги” сургалтаар Хот төлөвлөгөө, газрын харилцааны талаарх хууль эрх зүй, улсын эзэмшлийн газар түүний зохицуулалт зэрэг сэдвээр лекц унших гэнэ.
“Ус хангамж, бохир ус ариутгах татуургын системд нэвтрүүлж буй дэвшилтэд техник технологи” сургалтанд  БНСУ-ын ус хангамжийн бодлогын тогтолцоо, бохир ус цэвэрлэх байгууламж, усны бодлого зохицуулалт зэрэг сонирхолтой илтгэлүүд тавигдах аж.
“Дунд оврын дулаан хангамжийн эх үүсвэрийн дэвшилтэд технологи” сургалт дулаан хангамжийн талаарх  бүхий сэдвийг хөндөх бөгөөд дулааны байгууламж, дулааны цахилгаан хангамжийн байгууламж, нарны дулаан хангамж гэх мэт сэдвүүдээр илтгэл тавигдах гэнэ.
Дээрх сургалтууд бүгд 7 хоног үргэлжлэх бөгөөд сургалтын хүрээнд зохих үйлдвэрүүдтэй танилцах юм байна.