Нийслэлийн хамгийн хямд үнэтэй орон сууцаар тодорсон “Буянт-Ухаа-1” хорооллын орон сууцны захиалгын бүртгэлд бүртгүүлж,  хүсэлт гаргасан 9081 иргэний материалыг нэгтгэн Засгийн газраас баталсан журмын шаардлага хангаж буй эсэхийг нягтлан шалгах ажиллагаа дууссан тухай Төрийн орон сууцны санхүүжилтын корпораци /ТОССК/-аас өнгөрсөн 7 хоногт мэдэгдсэн.
 Мөн шаардлагад тэнцсэн эсэхээ өөрийн албан ёсны цахим хуудас болох http://tosk.gov.mn/ сайтад хандаж мэдэж болох тухай ч дуулгаж байсан. Журмын шаардлага хангасан, захиалгын хүсэлт гаргагчдын тоо  төрийн албан хаагч болон зорилтод бүлгийн иргэдэд хувиарлах орон сууцны тооноос илүү гарсан бол  сугалаа явуулна гэсэн заалтын дагуу сугалаа явуулах тухай ч яригдаж байсан билээ.  Тэгвэл энэ 7 хоногийн амралтын өдрүүдэд сугалааг явуулахаар шийдвэрлэжээ.
          Бямба гараг буюу 5-р сарын 10-ны өдөр 10-13 цагийн хооронд МҮОНТВ-ийн 2-рдугаар сувгаар олон нийтэд шууд дамжуулах бол маргааш өдөр нь мөн сувгаар 10-14 цагийн хооронд сугалаа явуулах ажиллагааг дамжуулан үзүүлэх юм байна.