Жира хэмээх Германы барилгын компаний ажилтнууд болох нэгэн гэр бүл  хөрсөн дээрх талбай ашиглалт багатай барилга барих  эрмэлзлээр энэхүү байшинг барьжээ.  Паул Де Рүйтерийн зураг төслөөр барилгыг хоёр салангид жигүүртэй байхаар тооцоолсон.  Шууд нүдэнд тусах барилгын үндсэн хэсэг нь газраас 3.5 метр өндөрт байрлах бөгөөд гэр бүлийнхэн өдрийн ихэнх цагийг энд өнгөрүүлэхэд зориулагдсан бол хоёр дахь буюу газар доорх хэсэг нь албаны болон ахуйн зориулалттай. Салангид хоёр жигүүрийг  ганц босоо шатаар холбосон бөгөөд өрөөнүүдэд тавилга болон бусад эд хогшил бараг байхгүй гэхэд хилсдэхгүй. Эцэст нь нийт 8,000 м ам дөрвөлжин талбай бүхий орон сууц маань бүх талаараа цэмцгэр, цэгцтэй, уран барилгын чухал ач холбогдолтой бүтээл болж чаджээ.
     Газар доорх хэсэг нь байшин, барилгын хонгилын хэсгийг санагдуулах бөгөөд газраас өргөгдсөн хэсэгтэй перпендикуляр үүсгэн байрлажээ.  Яг энэ газар доорх хэсэгт агуулах, албан өрөө, олон нийтийн болон хэрэгцээ багатай өрөөнүүд, 7  машины зогсоол бүхий асар том граж бий.
Эсрэг тэсрэг зохилдлого бүхий байшингийн аажим уруудсан үүдний хэсгээс газраас өргөгдсөн хэсэг хүртэл нэлээн зайтай харагдах ажээ.  Багахан таримал мод бүхий тэгш талд баригдсан барилгын дээрх хэсэг нь бүхэлдээ шилэн,  нэвт харагдах атал дотор нь байрлах усан сан давхар шилэн ханаар хүрээлэгдснээр хувийн орон зайг үүсгэнэ.
    Тэгш тал газар байрлах боловч  эргэн тойронд хөрш айлгүй тул хувийн орон зайн асуудлыг төдийлөн чухалчилж үзээгүй байна.  Учир нь бүхэлдээ нэвт харагдах шилэн фасад нь хүн ам нягт суурьшсан газар байх боломжгүй юм.  Гэсэн хэдий ч энэ асуудлыг ор тас орхигдуулсангүй. Нийт 71000 модны үрсэлгээг тус эдлэн газрыг тойруулан суулгасан байна.
      Шатны хэсэгт маш бага орон зайг зориулсан бөгөөд энэхүү шатаар дамжин онгоцны буудлыг санагдуулам барилгын дээд хэсэгт болон доод хэсэгт хүрэх боломжтой.  Шатыг тойруулан шилэн хана босгосон нь гэрийн дээд доод заагийг холбогч буюу дамжих хэсэг болохыг илтгэнэ.
     Бүхэлдээ шилэн цонх хийснээр Германы хурц биш нарны туяа өрөөг бүхэлд нь гэрэлтүүлэхийн зэрэгцээ орчныг чөлөөтэй харах боломжтой болгоно.  Түүгээр зогсохгүй энэ том байгууламжийг дулаанаар хангахад нэмэр болохын сацуу нарны болон салхин эрчим хүчний тусламжтай цахилгааны асуудлыг шийдвэрлэхэд тусалжээ.
      Ганц нэг буйдан, тавилгыг эс тооцвол барилга цэвэрхэн уужим.  Хэн нэгэн хүн хажуугаар нь өнгөрч яваад  шохоорхож харахгүй байхын аргагүй ийм нэгэн байшинг Герман улсад барьжээ.