“Барилга экспо-2014” үзэсгэлэнгийн эхний хэсэг болох Барилгын материал үйлдвэрлэгчдийн үзэсгэлэн олны хөл хөдөлгөөн ихтэйгээр үргэлжилж байна.  Харин 2 дахь хэсэг Орон сууц хаус дизайны үзэсгэлэн 5-р сарын 02-04-ний өдрүүдэд "Мишээл экспо" төвдөө үргэлжлэх билээ.
Ингээд  эхний хэсгийн үзэсгэлэнд оролцож буй компаниуд болон үзэгчдийн сэтгэгдлээс хуваалцсанаа хүргэе.



 “Модерн тайга” ХХК-ийн гүйцэтгэх захирал Э.Энхчимэг

-Манай компани Монголд болж буй барилгын бүхий л үзэсгэлэнд оролцож өөрсдийн үйл ажиллагаа сурталчилдаг. “Барилга экспо”-гийн бол байнгын оролцогч нарын нэг. Энэ удаагийн үзэсгэлэн урьд урьдын жилүүдээс илүү их орлцогчтой манай ард иргэд ч гэсэн маш ихээр ирж үзэж сонирхож байна. Манайх канад модон сууцыг угсардаг. Гэхдээ тэр чигээр нь хуулах маягаар угсрах биш өөрийн орны онцлог, нөхцөл байдалд тохируулан угсарч өгдөгөөрөө онцлог.  Сүүлийн үед хүмүүс хувийн хаустай болох сонирхол ихтэй болсон мөн цэвэр модон технологи болохоор тэр биз захиалга ч ихийг авч чадлаа.
Иргэн Р.Дандаабаяр

-Ах нь сантехникийн мэргэжилтэй хүн байгаа юм. Мэргэжлийнхээ дагуух шинэ техник технологитой танилцахаар л энэ үзэсгэлэнд ирлээ. Хүн ч их, оролцогч компаниуд ч их байна. Бас л сайхан зүйлүүд их байдаг болж, миний ид ажиллаж байх үед ийм гоё технологууд байсан бол гэж бодогдоод л танилцаж явна. Барилгын үзэсгэлэн их гоё болж байгаа юм байна.
“Т энд жи” ХХК-ийн менежер Л.Төмөрсүх

-Үзэсгэлэн энэ жил их өргөн цар хүрээтэй болж байна. Манайх барилгын архитектур зураг төсөл хийх чиглэлээр үйл ажиллагаагаа явуулдаг компани. Мөн барилгын дээврийн материалыг Шинэ Зеланд, Польш, Солонгос зэрэг улсуудаас импортолж оруулж ирдэг  юм.  Барилгын улирал эхэлж байгаа болохоор хүмүүс хувийн сууцныхаа дээврийг засах, шинэчлэх зорилгоор бас шинээр барилга барьж байгаа компаниуд  бүтээгдэхүүнийг маань маш ихээр сонирхож байна. Хүмүүс олноор хүрэлцэн ирж сонирхож байгаад баяртай байна.