Австрийн өмнөд уулархаг Тирол мужид нэгэн гэр бүл захиалсан энэхүү авсаархан шинэлэг байшин нь  амьдрах аятай тухтай орчинг бүрэн бүрдүүлсэн байгалийн үзэмж төгөлдөр газар  баригдсан сууц юм. Одоогийн байдлаар цанаар гулгах хүсэлтэй хүмүүст 7 хоногоор түрээслүүлж байгаа уг байшинг барихдаа уламжлалт болон орчин үеийн загвартай нэгтгэсэн нь  байгаль орчинд нийцсэн цоо шинэ бүтээл болжээ. Гадна талдаа 2 өөр загварыг бий болгосон. Урд талаас нь харахад хурц өнцгүүд бүхий тэгш бус хэлбэртэй. Харин нөгөө талдаа сүүл мэт харагдах үүдний хэсэгтэй. Байшинг төмөр тулгуур дээр босгосон нь газар бага хөндөхийн зэрэгцээ орчны үзэмжийг тольдох боломжийг нэмэгдүүлж байна. Тэр бүр далайн эргийн бүс нутгуудад харагддагүй иймэрхүү загвартай байшинд  том, жижиг цонхнуудыг тохиромжтой газар нь суурилуулж өгснөөр нээлттэй, гэрэл бүх хэсэгт чөлөөтэй тусахуйц болжээ. Байшинг харахад өвөрмөц, орчин үеийн боловч уламжлалт барилгын хэв загварыг ч өөртөө шингээж өгсөн.
         Тосгоны барилгын гайхамшиг зөвхөн гаднах өнгө хэлбэрээр хязгаарлагдсангүй. Дотроо ч маш энгийн атлаа  эрхэмсэг зохицлыг бүрдүүлж чаджээ. Дан ганц модоор дотор хэсгийг хийснээр энэхүү хамгийн өвөрмөц эсвэл ирээдүйг харсан барилга нь хүмүүст   дотно, дулаахан мэдрэмж төрүүлж байна. Өрөө болгонд өөрийн гэсэн дизайны шинэлэг элементийг оруулж өгчээ.  Тэр  бүү хэл шат нь хүртэл бүхэлдээ уран барилгын шийдэлд орно.
      Сүүл мэт арын хэсэг нь LED гэрэл, зуух, угаалтуур, хоолны шүүгээ гээд гал тогооны сонирхолтой орчинг бүрдүүлэхэд ихээхэн нөлөө үзүүлжээ.  Орчин үеийн шийдэл бүхий гал тогоонд мод түлэх зуух байрлуулснаар өнгөрсөн, ирээдүй хоёрыг чадварлаг зохицуулсан гэлтэй. Харин гал тогооны ширээ нь энгийн нэг тавилга бус тус барилгын нэгээхэн хэсэг болохын хувьд  нэг талд нь төмөр хөл нөгөө талаараа цонхны нэг хэсэг болж байна.
        Гол хоёр цонхоор гэрэл хангалттай тусах бөгөөд нэг нь ой хөвчийг харах боломжийг бүрдүүлэх бол нөгөө нь тэнгэрийг бүхэлд нь харуулж байна. Хоолны ширээний дээд талд байрлах тавцан дээрээс орчны үзэмж хамгийн сайхан харагдах ажээ. Энэхүү өндөрлөг тавцан нь гал тогооны шалнаас нэлээн дээр байрласнаар хэд хэдэн хүн суугаад чөлөөтэй ярилцах нөхцлийг бүрдүүлсэн.