“Ногоон барилга”  гэхээр зүлэг ногоо, цэцэрлэгжүүлэлт сайтай байна гэсэн ойлголт бараг хүн бүрт байдаг. Тэгвэл дэлхий өндөр хөгжилтэй орнуудад “Ногоон барилга” гэдэг нь байгаль экологид сөрөг нөлөөгүй, эрчим хүчний хэмнэлттэй барилгыг хэлдэг.  БНСУ “ногоон барилга” гэдгийг хэрэгжүүлээд багагүй туршлага хуримтлуулж байгаа.
 Монголын барилгын материал үйлдвэрлэгчдийн холбооны урилгаар БНСУ-ын Барилгын технологийн Хүрээлэнгийн төлөөлөгчид өнөөдөр ШУТИС-ийн удирдлагуудтай танилцаж, барилгын салбарт нэвтрүүлж байгаа шинжлэх ухаан, шинэ технолгийн талаар семинар 4 сарын 28-ны өдөр болж өнгөрлөө.
 Уг семинарт Монголын барилгын материал үйлдвэрлэгчдийн холбооны удирдлагууд болон барилгын материал үйлдвэрлэгч компаниудын төлөөлөл хүрэлцэн ирж сонирхсон юм. 
 Семинарыг “Барилгын эрчим хүч хэмнэлтийн төв”-ийн захирал Б.Мөнхбаяр эрчим хүчний хэмнэлтийн хувьд манай улс хэр хэмжээнд явж байгааг дурдаад, цахилгаанаасаа илүү дулаанд ихээхэн төсөв зарцуулдаг болохыг хэлж байлаа.

 

  БНСУ-ын Барилгын технологийн Хүрээлэнгийн захирал Choi, Gyeong Seok семинарт хүрэлцэн ирсэн зочдод өөрийн улсад нь хэрхэн ногоон барилгын бодлого хэрэгжиж байгааг дуулгасан. Мөн шинэ хуучин барилга, орон сууцны дулаалгыг хэрхэн шийдэж өгч байгааг илтгэсэн ведио бичлэг үзүүлсэн. Байгаль экологид сөрөг нөлөөгүй, хүний биед харшлахгүй, дулаан сайн барьдаг, галд тэсвэртэй шүршдэг хөөсөнцөрөн бүтээгдэхүүнээр шинэ хуучин барилга, орон сууцны дулаан алдалтыг бүрэн шийдэх боломжтойг хэлж байлаа. Мөн БНСУ өнөөдөр эрчим хүчийг хэмнэж, түүнчлэн хийн зүлшгий хэрэгцээгээ хүртэл багасгаж орлуулах бүтээгдэхүүн бүтээхийг эрэлхийлж байгааг энэ үеэр хэлэв.
 Манай улсад “Ногоон барилга” гэсэн ойлголтыг бүрэн дүүрэн хэрэгжүүлэхийн тулд хууль эрхзүйн орчин болоод бүрэн дүүрэн мэдээллээр хангах явдал нь нэн тэргүүнд хийгдэх хэрэгтэй байгааг семинарт оролцогчид хэлж байлаа.