Энэ асуултанд хариулт өгөх нэгэн зөвлөгөөн өнөөдөр нийслэл хотноо болсон юм. Улаанбаатар төмөр замаар тээвэрлэгдэж буй ачаа тээврийн багагүй хувийг барилгын материал эзлэдэг. Иймд барилгын материал экспортлогчид болоод барилгын материалын ачаа тээврийг зохицуулж, хянадаг төрийн байгууллагуудын дунд “Тээвэрлэлтийг хурдасгая” зөвлөгөөнийг жил бүр зохин байгуулж хэвшжээ.
Зөвлөгөөнд БХБЯ, ЗТЯ, Гаалийн ерөнхий газар, МХЕГ зэрэг газрын мэргэжилтэнүүд хүрэлцэн ирж оролцов. Мөн Улаанбаатар төмөр замын ачаа тээврийн албаны дарга Б.Энхбаяр, Хөдөлгөөн зохицуулалтын албаны дарга П.Батхуяг, Замын –Үүд шилжүүлэн ачих ангийн дарга Л.Баасандорж нарын хүмүүс байлцаж, өөрсдийн алба, ангийн онцлог, хийгдэж байгаа ажил, хүндрэл бэрхшээлийн талаар хуваалцан илтгэл тавьсан юм.

Улаанбаатар төмөр замаар өнгөрсөн онд 16 сая гаруй тонн ачаа ачигдсанаас 2 сая гаруй нь барилгын материал байжээ. Үүнээс цемент дангаараа 1 сая гаруй тонн байсан бөгөөд төмөр, арматурын экспорт мөн тонны хэмжээтэйгээр орж ирж, үлдсэн багахан хувийг будаг, цонх, шил, хаалганы экспорт эзлэжээ. 2010 оны хямралын үеийг эс оруулбал өнгөрсөн жилүүдэд төмөр замаар орж ирэх барилгын материалын ачаа эргэлтийн тоо байнга өсөлттэй байсан төдийгүй цаашид ч өсөх хандлагатай байгаа юм. Хэдийгээр 2хон жилийн дараагаас дотоодын цементийн томоохон үйлдвэрүүд ашиглалтанд орохоор зэхэж байгаа ч зах зээлийн хуулийн дагуу хямд үнэтэй хятад цементийн эрэлт байсаар байх болов уу хэмээн холбогдох албаныхан тооцоолж ачаа эргэлтийг сайжруулах талаар дээр зорилтод хөтөлбөрүүд хэрэгжүүлэн ажиллаж байгаагаа хэлж байсан. Тухайлбал: Улаанбаатар төмөр замд одоогийн байдлаар цемент тээвэрлэхэд зориулсан битүү вагон 266 байгааг цаашид 400 болгох, бараа бүтээгдэхүүний ачилт дээр хүний гар ажиллагааг багасгаж механикжуулах зэрэг ажлуудыг ойрын хугацаанд хийхээр төлөвлөж байгаа аж.
Одоогоор Замын-Үүд боомт дээр төмөр замын ачаа ямар нэг хүлээлтгүйгээр нэвтэрч байгаа бөгөөд барилгын улиралын ид үе 6-аас 9-р саруудад хүлээлт үүсч болох учир урьдчилан ажлуудыг зохион байгуулах гэнэ. Мөн хүлээлт үүсэх нэг том шалтгаан нь барилгын материал экспортлогчид өөрсдөө байдгийг төмөр замын удирдлагууд сануулаад авсан.
Учир нь барилгын материал экспортлогчид буулгах талбай байхгүй, хүлээн авагч компани өөрчлөгдсөн гэх мэт шалтгаанаар ачаагаа авахгүй удах тал байдаг гэнэ. Энэ нь төмөр замынханы ажилд төвөг учруулаад зогсохгүй бусад бизнес эрхлэгчдэдээ ихээхэн саад болдог байна.
Албаны хүмүүсийн илтгэл тайланг сонссоны дараа барилгын бизнес эрхлэгч, экспортлогчид санал бодлоо солилцов.
“Тээвэрлэлтийг хурдасгая” зөвлөгөөн цаашид ч зохиогдох бөгөөд өмнөх жилүүдэд уг зөвлөгөөнөөс гарсан дүгнэлтүүд ажил хэрэг болсны улмаас Улаанбаатар төмөр замын ачаа тээвэрлэлт жил ирэх тусам эрчимжиж байгааг онцолж байлаа.