Барилгын Зөвлөгөө мэдээллийн төвөөс жил бүр уламжлал болгон зохион байгуулдаг “Basketball 2014” сагсан бөмбөгийн тэцмээн өнгөрсөн амралтын өдрүүдэд амжилттай болж өндөрллөө. Эхний өдөр тэмцээний нээлтэнд Монголын Барилгачдын Холбооны М.Батбаатар, Монголын Барилгын материал үйлдвэрлэгчдийн Холбооны дэд ерөнхийлөгч Ч.Баатарсүрэн, Монголын Барилгын Инженерүүдийн холбооны гүйцэтгэх захирал Б.Ганмөр, Барилга Хөгжлийн төвийн захирал Б.Баярсайхан, “Basketball 2014” сагсан бөмбөгийн тэмцээний ерөнхий ивээн тэтгэгч “Хера Констракшн” ХХК-ны захирал н.Дарханбаатар, Барилгын Зөвлөгөө Мэдээллийн Төвийн захирал Г.Батсүх нар оролцлоо.
 Тус тэмцээн 4 дэх жилдээ зохион байгуулагдаж байгаа бөгөөд нийт 40 баг оролцсоноос эрэгтэй 32, эмэгтэй 8 баг өрсөлдсөн. Эхний өдөр эрэгтэй 8 зооны тоглолтууд дуусаж, дараагийн өдөр зооноосоо нэг, хоёроор гарсан багууд болон эмэгтэй багуудын хоорондох тэмцээн өрсөлдөөнтэй болсон. Ингээд медалийн төлөөх тоглолтууд ар араасаа хөвөрч, ширүүн өрсөлдөөнтэй, үзүүштэй тоглолтууд дүүрэн болж өнгөрлөө.
  Эмэгтэй хүрэл медалийг “Хера Констракшн” ХХК , мөнгөн медалийг “Альянс Тех” ХХК, Алтан медалийн эздээр “БҮТИ” ХХК-ны  баг тамирчид шалгарч өргөмжлөл, мөнгөн шагнал хүртсэн.
 Эрэгтэй хүрэл медалийн эздээр “БҮТИ” ХХК-ны баг тамирчид тодорсон. Харин алтан медалийн төлөөх тоглолт “Барилга.МН”,  “Альянс Тех” ХХК-ны эрэгтэй багууд хооронд өрнөж,  тоглолтын үндсэн цагт дуусахад 14:14 харьцаатай тэнцсэн. Ингээд нэмэлт цагт / 2 мин/  17:16 харьцаатайгаар “Альянс Тех” ХХК эрэгтэй баг алтан медаль, Барилга.МН сэтгүүлийн баг мөнгөн медалийг тус тус хүртэж, өргөмжлөл мөнгөн шагналын эзэд боллоо. Уг сагсан бөмбөгийн тэмцээнд “БҮТИ” ХХК, “Альянс Тех”ХХК-ны багууд тус тус цомын эзэд боллоо.