Нийслэлийн хэмжээнд орон сууцны барилгын дундын өмчлөлийн эд хөрөнгийн засвар үйлчилгээг хариуцан ажилладаг  500 гаруй Сууц өмчлөгчдийн холбоо бий.
      Энэхүү холбоод нь “Сууц өмчлөгчдийн холбооны эрх зүйн байдал, нийтийн зориулалттай орон сууцны байшингийн дундын өмчлөлийн эд хөрөнгийн тухай” хуульд  заасны дагуу орон сууцны байшингийн дундын өмчлөлийн эд хөрөнгийг засварлах үүрэгтэй. Энэ үүргээ биелүүлж чадахгүй байгаагаас орон сууц элэгдэж чанар, үнэ цэнэ буурах үндэс суурь болдог. Тиймээс энэ заалтын хэрэгжилтийг хангах үүднээс Улаанбаатар хотын Захирагчийн ажлын албанаас нийтийн зориулалттай орон сууцны байшингийн дундын өмчлөлийн эд, хөрөнгөд элэгдлийн нэгдсэн сан байгуулахаар ажиллаж байна. Элэгдлийн санг байгуулснаар мөнгөн хуримтлал бий болж, урсгал болон их засваруудыг хийх боломж бүрдэн, орон сууцны байруудыг дулаалан, иргэдийн амьдарч буй байрны үнэ цэнийг өсгөх, хэрэглэгчдэд хүрэх үйлчилгээг сайжруулах давуу талтай болох аж.