Арабын нэгдсэн Эмират улсын Дубай хот гоё сайхан барилгуудаараа жуулчдын анхаарлыг хэдийнээс татах болсон билээ. Тэдний нэг өнгөрсөн жил ашиглалтад орсон Эргэдэг байшин юм. 420 метрийн өндөртэй 80 давхар энэ барилгын зураг төслийг Италийн архитектурч Давид Пишер гаргажээ.
 Энэ байшин яагаад олны анхаарлыг татах болов. Энэ аварга байшин 90 минут тутамд нэг давхараас 80 давхар хүртэл эргэдэгт гол учир буй юм. Мөн нар, салхины эрчим хүчийг өөртөө хуримтлуулан цахилгаан үйлдвэрлэдэгээрээ бусдаас онцлог. Ийм ч учраас өнгөрсөн жил Америкийн дизайн,  урлагийн холбооноос дэлхийн шилдэг 50 бүтээлийн нэгээр нэрлэсэн байна.
Давхар бүр тус тусдаа салан эргэж чаддаг нь энэ барилгын бас нэгэн гайхамшиг төдийгүй холоос харахад аварга том аварга ороонго ургамал шиг харагддаг.
Давхар тус бүр нэг нэгээр эргэсээр яг 90 минутын дараа нэгэн цогц болдог. Эргэлдэж байгаа байшин дотор удаан байхаар толгой эргэх болов уу гэж жуулчид хамгийн их асуудаг гэнэ. Гэвч зохион бүтээгч нь 90 минутын турш алгуур эргэж байгаа учир дотор байгаа хүнд энэ нь огтхонч мэдэгдэхгүй гэжээ. Үнэхээр ч тийм болохыг олон хүн баталжээ.
 Хүнд зузаан шилэн хананууд нь нарны илчийг хангалттай цуглуулж доторх байгууллагуудаа цахилгаанаар хангаад зогсохгүй ойр орчмын барилгууддаа ч цахилгаан түгээдэг байна.
 Давхар болон давхруудын хооронд байх 48 ширхэг хэвтээ тавцангууд нь машины зогсоол болох төдийгүй салхины эрчим хүчийг цуглуулах сэнстэй байдаг.
 Эргэдэг байшин дэлхийн хамгийн том шилэн барилгуудын нэг болсон төдийгүй эдгээр шилэн хануудын дотор талд томоохон усан сан, ресторан байрладаг. Энэ нь үйлчлүүлэгчиддээ барилгын эргэн тойрныг бүхлээр нь  харах боломжийг олгодог.

П.Өлзий