УИХ-ын хаврын чуулган энэ 4-р сарын 7-нд нээлтээ хийлээ. Хаврын чуулганаар 252 хууль тогтоомжийн төсөл хэлэлцүүлэгдэхээр санал гаргасан ч дөнгөж 52 нь өргөн баригдсан байна. Эдгээр өргөн баригдсан хуулийн төслөөс гадна барилгын салбарынхантай холбоотой нэгэн асуудал хэлэлцэгдэх нь царцаасан барилгын аудитын шалгалтын дүн юм. Улсын төсвийн хөрөнгөөр баригдаж буй нилээд олон тооны барилга байгууламжууд анх тооцсон төсвийн дүнгээс зардал нь хэтэрсэнээс цаашид үйл ажиллагаа нь явагдах боломжгүй болж зогсонги байдалд орсныг “царцаасан барилга” хэмээн нэрлээд байгаа бөгөөд улсын хэмжээнд 271 обект бий гэнэ. Анх 14 тэрбум төгрөгт босохоор төсөвлөгдсөн барилга 21 тэрбум болж өсөн санхүүжилт дутснаар царцааж байгааг УИХ-ын зарим нэг гишүүдийн зүгээс аймаг, сумдын болоод нийслэл дүүргийн төсөв зохиодог хүмүүс нарийн тооцоо судалгаа хийхгүйгээр барилга барихаар шийддэгээс үүдэлтэй гэж тайлбарлаж байгаа ч татвар төлөгчдийн мөнгөнд үрэлгэн ханддагийн тод жишээ гэх хүмүүс ч байна. Ямартай ч хаврын чуулганаар эдгээр төсөвт зардал нь хэтэрч царцаагдсан барилгуудын асуудлыг нэг тийш болгохоор хууль тогтоогчид өнөөдрөөс шамдан орлоо. Гагцхүү оновчтой шийдвэр гарахыг хүлээх л үлдлээ.