Гэр хорооллын дахин төлөвлөлтийн хүрээнд Сүхбаатар дүүргийн VII хорооллын хэсэгчилсэн ерөнхий төлөвлөгөөний дагуу "Pro One" хэмээх төслийг хэрэгжүүлэхээр болсон билээ. Энэхүү төсөл амжилттай хэрэгжвэл Улаанбаатар хотын “Бизнесийн шинэ төв цэг” шинээр бий болох юм. Төслийг хэрэгжүүлэгч “Мастер пропертис” ХХК хамгийн сүүлийн үеийн оффисын барилгыг босгохоор зорьж байгаа бөгөөд гүйцэтгэгч компаниар “Трейд тавор” ХХК-ийг сонгосон байна.
      “Бизнесийн шинэ төв цэг”-ийн нээлтийн үйл ажиллагаа өнөөдөр болж, БХБЯ-ны Барилга, барилгын материал хэрэгжилтийн зохицуулах газрын дарга Б.Цэдэнсамба,  БХБЯ-ны Хяналт шинжилгээ үнэлгээ дотоод хяналтын газрын дарга Д.Мөнхбаатар, Нийслэлийн дахин төлөвлөлтийн газрын ахлах мэргэжилтэн С.Даланжаргал зэрэг албаны хүмүүс оролцсон юм. Энэхүү барилгын зураг төслийг “Тусгаар тогтнолын ордон”-ы архитектурыг гаргасан архитекторч  Ц.Энхбат зохиосон бөгөөд төслийг хэрэгжүүлэгчид Чингисийн талбайгаас нэг км зайд нийслэл хотын үзэмжинд өнгө нэмсэн гоёмсог барилгыг барьж босгохоор шамдаж байгаагаа хэлсэн. Мэдээж хотын төвд оффисстой болох хүсэлтэй хүн болгон захиалгаа өгч болно. Бизнесийн шинэ төвийн барилга ирэх оны дөрөвдүгээр улиралд буюу 10-р сард ашиглалтанд орох гэнэ.