Ресторан гэхээр бидний ойлголтоор дөрвөн хананы голд хэд хэдэн ширээ тавьсан хоолны газрыг төсөөлдөг.  Дотоод тохижилт,  харагдах орчин, хоолны нэр төрлөөр бусдаас ялгагдах боловч дахин давтагдашгүй өвөрмөц байж чаддаггүй.

         
         Тэгвэл агаарт  тэр тусмаа 50 метрийн өндөрт оройн зоог баривал ямар вэ? Боломжгүй зүйлийг бодит болгосон “Агаарын оройн зоог” хэмээх энэхүү ресторан нь  9 м урт, 5 м өргөн тавцан бүхий ширээг 120 тонны краны тусламжтай газраас 40, 50 метрийн өндөрт өргөн үйлчилгээ явуулдаг.  Нийт 22 үйлчлүүлэгч тойрон сууж  5 рестораны ажилтан тэнд дээд зэргийн хоолоор үйлчилнэ. Тээвэрлэх шаардлагатай үед энэхүү тавцан бүхий ширээ нь  2.5 м өргөн, 6 м урт болон эвхэгдэх боломжтой. Ширээнд хүмүүс суугаагүй нөхцөлд 5 тонн жинтэй бөгөөд нийт 7 тонны даацтай.



        Нийт 22 суудал нь суурин дээрээ 180 градус эргэх боломжтой. Үйлчлүүлэгчдийн аюулгүй байдлыг  4 оосорт суудлын бүсээр  хангахын зэрэгцээ телевиз, хөгжим, гэрэлтүүлэг, дулаан зэрэг нэмэлт хэрэгсэлтэй. Харин ариун цэврийн өрөөнд орохын тулд газарт буух шаардлагатай бөгөөд  буух болон дээш гарахад ердөө нэг минут хангалттай.



        Тус компаний хувьд “Агаарын хуримын ёслол”, “Агаарын амралт”, “Агаарын шоу” зэрэг үйлчилгээг мөн хүргэдэг байна.