Улсын хэмжээнд “Барилга байгууламжийн чанар-хөдөлмөрийн аюулгүй байдал”  сарын аяныг  өнөөдрөөс  эхлүүллээ. Сүүлийн гурван жилд 1209 удаагийн үйлдвэрлэлийн осол гарч, үүнд 1280 хүн өртөж, 213 иргэн нас барж, 285 хүн хөгжлийн бэрхшээлтэй болсон байна. Харин дээрх тоо баримтыг салбараар нь ангилан авч үзвэл уул уурхай болоод барилгын салбарт  гарсан ослын тоо хамгийн их байгаа юм. Нийт ослын 88 хувь нь хөдөлмөрийн аюулгүй ажиллагааг хангаагүйгээс үүдэлтэй байгаа нь ажиллагсдын аюулгүй ажиллагааны мэдлэгийг дээшлүүлэх шаардлагатай болсныг харуулж байна. Иймд МХЕГ-аас хөдөлмөр аюулгүйн ажиллагааны хяналт шалгалтыг сайжруулах зорилгоор байцаагч нарынхаа дунд олон төрлийн сургалт, семинарыг энэ жил зохион байгуулахаар төлөвлөжээ. Харин улсын хэмжээд зохиогдож байгаа аяны хүрээнд өнөөдөр барилгын салбарт хяналт тавин ажилладаг  улсын байцаагчдын сургалтыг өөрийн байрандаа зохион байгуулсан бөгөөд сургалтанд нийслэл болоод 21 аймгийн барилга техникийн хяналтын улсын байцаагч нар оролцож байна.
  МХЕГ-аас шинэ он гарсаар барилгын салбарт гарч буй осол аваарыг бууруулах зорилгоор Улаанбаатар хотын зургаан дүүрэгт баригдаж буй 17 болон түүнээс дээш давхар бүхий 20 цогцолборын 51 барилга байгууламжид хяналт шалгалтын ажлыг хийжээ. Шалгалтаар илэрч буй зөрчлийн 46,2 хувь нь барилга угсралт, 23,5 хувь нь материалын чанартай холбоотой байсан бөгөөд  орчны эрүүл ахуй, хөдөлмөрийн нөхцөл, аюулгүй байдлын зөрчил хамгийн өндөр буюу 60,7 хувийг эзэлсэн байна. Мөн өнгөрсөн гурван жилийн хугацаанд улсын хэмжээнд ашиглагдаж буй барилга байгууламжийн ашиглалтын төлөв, бат бэхийн байдалд шалгалт хийн 656 сургууль, 686 цэцэрлэг, төрийн өмчит 512 эмнэлэг, үзвэр үйлчилгээний 401 барилгын 33-48 хувь нь газар хөдлөлтөд тэсвэрлэх чадвар буурсан болохыг тогтоож холбогдох байгууллагад  аюулгүй байдлыг хангуулах арга хэмжээ тавьж ажиллахыг  шаарджээ.
  МЕХГ “Барилга байгууламжийн чанар-хөдөлмөрийн аюулгүй байдал“ сарын аяны хүрээнд барилга, эрчим хүч, уул уурхай, газрын тос, зам тээвэр зэрэг бүхий л салбарт баригдаж байгаа болон ашиглагдаж байгаа барилга байгууламжийн чанар, бат бэх, аюулгүй байдлыг хангахад чиглэсэн арга хэмжээг мэргэжлийн хяналтын байгууллагууд болон  холбогдох мэргэжлийн байгууллагуудтай хамтран зохион байгуулахаар төлөвлөж байгаа төдийгүй урьдчилан сэргийлэх, зөвлөх, хяналт шалгалтыг хийх юм.