Засгийн газрын 2013 оны 181-р тогтоолын хүрээнд Буянт-Ухаа орчимд баригдах орон сууцны хороолол, барилга байгууламжийн инженерийн дэд бүтцийг сайжруулах ажлын хүрээнд Барилга, хот байгуулалтын яамны захиалгаар Хан-Уул дүүрэгт байрлах Цэвэрлэх байгууламжийн өргөтгөлийн ажлыг “Үндэсний барилга консерциум”-ын гишүүн компани Гэрэгэ констракшн, Бүгд Найрамдах Турк  улсын SPG, ARITM групптай хамтран барьж өнөөдөр нээлтээ хийлээ.
          Нээлтийн үйл ажиллагаанд БХБ-ын сайд Ц.Баярсайхан, БНТУ-аас Монгол улсад суух онц бөгөөд бүрэн эрхт элчид сайд Мурат Карагөз, ҮБК-ын гүйцэтгэх захирал Д.Цэнд, SPG группын захирал Лиззет Билгүн болон бусад албаны хүмүүс оролцов.
      Энэхүү цэвэрлэх байгууламж нь Хан-Уул дүүргийн 9,10-р хороонд байрлах төрөх эмнэлэг, ахмадын эмнэлэг, архив болон ТОСК-ын захиалгаар баригдсан Буянт-Ухаа 1 хорооллын бохир усыг 98 хувь цэвэршүүлэх бөгөөд хамгийн орчин үеийн дэвшилтэт технологиор тоноглогдсон гэдгээрээ давуу талтай аж.
     Өмнө нь ажиллаж байсан Нисэхийн 1000м³ багтаамжтай байсан уг цэвэрлэх байгууламжийн хүчин чадлыг нэмэгдүүлснээр хоногт 2000м³ бохир усыг цэвэрлэх боломжтой болж байгаа гэнэ. Мөн бохир усны органик бохирдлоос гадна азот, фосфор зэрэг бодисуудыг ялган цэвэрлэх чадалтай, байгууламжаас гарсан лагийг хатааж фильтр прессээр шахмал болгон зайлуулдаг байна. Түүнчлэн бохир усыг олон улсын стандартын дагуу цэвэрлэсний дараа байгальд асгах бүрэн автомат ажиллагаатай гэдгийг албаныхан онцоллоо.