Барилгын салбарын цогц мэдээллийг түгээгч Барилга.МН сэтгүүлийн 2-р улирлын эхний дугаар захиалагч, уншигчдын гарт очиход бэлэн боллоо. Энэ дугаараас барилгын салбарт өрнөж буй зарим үйл явдлын товчоон, Барилга, хот байгуулалтын сайд Ц.Баярсайхан барилгын материалын үйлдвэрүүдтэй танилцсан тухай сурвалжлага, БХБЯ-ны ахлах мэргэжилтэн Л.Болд, Нийслэлийн байгаль орчин, ногоон хөгжлийн газрын хэлтсийн дарга Ч.Болдбаатар нарын хүмүүстэй хийсэн сонирхолтой ярилцлага, Монголын барилгын материалын үйлдвэрлэлийн өнөөгийн байдлын талаар асуудал дэвшүүлсэн идэвхитэн бичигчийн нийтлэл, Монголд нэвтрээд нэгэн дэвшилтэт технологи буюу Эко авто зогсоолын талаарх танилцуулга зэрэг мэдээ мэдээллийг уншихаас гадна ажил гүйцэтгэлийн үнэ ханш, барилгын материал, шинэ орон сууцны дэлгэрэнгүй үнэ ханшийн мэдээллийг манай сэтгүүлээс авах боломжтой. 
Ингээд сэтгүүлийн шинэ дугаарын товч агуулгыг хүргэе.

...Өнөөдрийн байдлаар үйлдвэрлэгчид дотооддоо цемент үйлдвэрлэхийн тулд урд хөршөөс  импортоор чулуунцар авах шаардлагатай болдог байна. Чулуунцар  нь цементийн бүрдлийн 80 гаруй хувийг эзлэх гол түүхий эд бөгөөд 20 хувьд бусад нэмэлт түүхий эдийг хольж тээрэмдсэнээр цемент бэлэн болдог. Иймээс цементийн үйлдвэрлэлийг нэмэгдүүлэхийн тулд чулуунцарыг дотооддоо их хэмжээгээр үйлдвэрлэх шаардлага тулгарч байгаа юм...

     ... Улаанбаатар хот баруун, зүүн гэсэн хоёр тал руугаа тэлээд сунаад л байна. Манайд чинь уул, усандаа хүрч болохгүй гэсэн уламжлалт заншил бас шашин шүтлэгийн үзэл нь давамгайлдаг боловч дархан цаазат газартайгаа буруу харьцаж байна. Солонгос улс гэхэд дархан цаазтай уулаа шавж бохирдуулж, ухаж нурааж, барилга барих, олон зам жим гаргаж, эрээчиж сүйтгэдэггүй. Харин доогуур нь тунел гаргаад, бүтээн байгуулалт, зам харилцаагаа байгаль орчиндоо ямар ч хор хөнөөлгүйгээр барьж байгаа юм. Манай хот заавал зүүн баруун тийш тэлэх биш 20, 30 давхар барилгатай цогц, цомхон хот байж яагаад болохгүй гэж...

... Нийслэлийн хот тохижуулах зардалд өнгөрсөн жил 41.1 тэрбум төгрөг зарцуулсан бол энэ онд 60.7 тэрбум төгрөг болгож нэмэгдүүлсэн байна.  Ингэж их мөнгө зарцуулахдаа нүдэнд торохуйц юм үлдсэн нь тун цөөн. Зуны турш нийслэлийн төв гудамжаар цэцгийн мандал алаглаж байсан ч энэ нь богино настай, үр дүн багатай ажил байлаа. Хотоо тохижуулж байна гээд хөшөө дурсгал олноор барьдаг хэрнээ  усан оргилуур, цэцэрлэгийн төгөл, амарч зугаалах талбайгаа мартаж орхино. Заримдаа өнчин ганц хөшөө, нарийнхан зурвас төдий ургамал бутны тохижилт эсвэл тогтмол бус ажиллагаатай усан оргилуур босох нь бий... 

     Бид үндэснийхээ архитекторч, инженерүүдийг санаа авч, уран бүтээлийн байнгын эрэл хайгуул хийж байгаасай гэх үүднээс дэлхийн олон улсын зарим сонин содон барилга, архитекторын шинэлэг шийдэлтэй, мөн маш энгийн, нүсэр биш бүтээлүүдээс танилцуулж ирсэн. Ингээд сэтгүүлийнхээ энэ удаагийн дугаарт эгэл бус шийдэлтэй өвөрмөц барилгуудыг танилцуулахаар бэлтгэлээ.

     ...Одоогоос 40 гаруй жилийн тэртээ Монголын хүүхэд, залуучуудын техник сэтгэлгээг хөгжүүлэх үүднээс “Идэр техникчдийн ордон” хэмээх барилга сүндэрлэн боссон нь өнөөдрийн Монгол-Энэтхэгийн хамтарсан сургуулийн барилга ажээ. Энэхүү барилгыг баригдаж байх үеэс нь эхлэн тухайн үеийн нам төрийн удирдагч Ю.Цэдэнбал агсны гэргий Филатова “Гэрлэх ёслолын ордон”, “Идэр техникчдийн ордон” хоёрыг ЗХУ-аас бэлгэнд авах санаачлага гаргах гэж ихээхэн зүтгэсэн байдаг...

      ... Австрийн өмнөд уулархаг Тирол мужид нэгэн гэр бүл захиалсан энэхүү авсаархан шинэлэг байшин нь  амьдрах аятай тухтай орчинг бүрэн бүрдүүлсэн байгалийн үзэмж төгөлдөр газар  баригдсан сууц юм. Одоогийн байдлаар цанаар гулгах хүсэлтэй хүмүүст 7 хоногоор түрээслүүлж байгаа уг байшинг барихдаа уламжлалт болон орчин үеийн загвартай нэгтгэсэн нь  байгаль орчинд нийцсэн цоо шинэ бүтээл болжээ...