Улаанбаатар хотын захирагчийн ажлын албанаас  урин дулаан цаг ирж байгаатай холбогдуулан нийслэл хотдоо энэ сарын 04-өөс 19-ний өдрийг хүртэл бүх нийтийн цэвэрлэгээг хийхээр болжээ. Энэ онд нийслэл хот ийм томоохон  цэвэрлэгээг таван удаа зохион байгуулна гэж Улаанбаатар хотын Захирагчийн ажлын албаны Тохижилт, Хог хаягдлын удирдлагын хэлтсийн дарга Т.Батбаяр мэдэгдлээ.  
     Нийслэлийн 13 дүүргийн хэмжээнд энэ оны 05 сарын 24-нд зуслан ногоон бүсийн чиглэлд бүх нийтийн цэвэрлэгээ, 06 сарын 28, 10 сарын 18, 12 сарын 13-ны өдрүүдэд их цэвэрлэгээ хийгдэхээр төлөвлөсөн байна.
 Эхний ээлжийн цэвэрлэгээнд Нийслэлийн мэргэжлийн хяналтын газар, Нийслэлийн хөдөлмөрийн газар, “Нийтийн үйлчилгээний Улаанбаатар нэгтгэл”, Дүүргүүдийн засаг даргын тамгын газар, хороод, хог тээвэрлэгч байгууллагууд, Монголын сууц өмчлөгчдийн холбооны дээд зөвлөл, Монголын оюутны холбоо, Улаанбаатар такси ХХК, Хог хаягдлын үндэсний холбоо, Залуучуудын холбоо зэрэг байгууллагууд дэмжиж хамтран ажиллах юм. Хамтран оролцож байгаа байгууллагууд өөрсдөөсөө санхүүжилтээ гарган уг цэвэрлэгээнд оролцоно.
  Түүнчлэн нийслэл хотод үйл ажиллагаа явуулж байгаа худалдаа, үйлчилгээ эрхэлдэг байгууллагууд, төрийн болон төрийн бус байгууллагууд ойр орчмынхоо 50 метр орчимд угаалга цэвэрлэгээ хийнэ гэдгийг хотын захирагчийн албаны Хүнс, Худалдаа үйлчилгээний хэлтсийн дарга О.Нарантуяа хурлын үеэр хэллээ.
  Хотын их цэвэрлэгээнд оролцоогүй байгууллагуудад мэдэгдэл, албан шаардлага хүргүүлэх, торгуулийн арга хэмжээ ногдуулах, үйл ажиллагааг түр хаах, согтууруулах ундаагаар үйлчилдэг байгууллагын тусгай зөвшөөрлийг хураах зэрэг ажлыг зохион байгуулах, түдгэлзүүлэх саналыг хотын захирагчийн албанд тавина.
   “Хог хаягдлын тухай хуулийн” 9 дүгээр зүйлийн “9.1.5.оршин суугаа газар орчмын хог хаягдлыг цэвэрлэх, олон нийтийг хамарсан ажилд оролцох” гэсэн хуулийн шаардлагын дагуу  нийслэл хотын иргэд, аж ахуйн нэгж байгууллага бүхэн  их цэвэрлэгээнд идэвхитэй оролцохыг мэдээлэл хийх үеэр уриаллаа.