Үндэсний их баяр наадмаар Хүй долоон худагт иргэдийная тухтай, эрүүл аюулгүй орчинд баярлах нөхцөлийгбүрдүүлэх үүднээс “Монгол наадам” цогцолбор байгуулахаар болсон.  Уг ажлын явцтай Ерөнхий сайд Н.Алтанхуяг болон Засгийн газрын гишүүд, нийслэлийн удирдлагууд танилцсан байна.

        Эхний томоохон бүтээн байгуулалт болох төмөр замын 361-ийн гармаас Хүй долоон худаг хүртэлх 8.5 километр авто замын ажил бүрэн дуусчээ. Мөн 20 га талбайд 7000 гаруй автомашины зогсоол шинээр барьж байгуулахаар төлөвснөөс энэ жилдээ 5800 автомашины зогсоолыг барьж дуусгах шатандаа орсон байна. Автомашины зогсоолыг эко хавтангаар хийж, зүлэгжүүлсэн нь зөв шийдэл болсон байна гэж Ерөнхий сайд үнэлжээ. 12.5 га газарт худалдаа үйлчилгээ явуулах тойрог хэлбэрийн хоёр цардмал талбайн ажил бүрэн дууссан байна. Тойргийн голыг зүлэгжүүлж, баяр наадмын үеэр урлагийн тоглолт, шоу үзүүлбэр зохион байгуулах аж.

       Морь барианы зурваст 3000 үзэгчийн зөөврийн суудал байрлуулжээ. Хуучин хэрэглэж байсан суудлуудтай нийлээд 4000 гаруй үзэгч морь барианы газарт тухлах боломжтой болсон байна. Харин дараа жилээс “Монгол наадам” цогцолборт 8000 суудал бүхий саран хэлбэрийн цэнгэлдэх хүрээлэн байгуулахаар төлөвлөж байгаа юм.

Жил бүр шүүмжлэл дагуулдаг байсан хог хаягдал болон бие засах газрын асуудлыг энэ удаад бүрэн шийдвэрлэсэн байна. 50 метр тутамд хогийн сав байрлуулах ба дараа нь зөөвөрлөх боломжтой. Мөн ариун цэврийн шаардлага хангасан бие засах газруудыг байрлуулжээ.