“Улаанбаатар цахилгаан түгээх сүлжээ” компани нь нийслэлийн зургаан дүүрэг, Төв аймгийн 16 сумыг дулааны станцуудаас авсан эрчим хүчээр хангах үүрэгтэй. 2008 онд тус компани 176 мянган хэрэглэгчид үйлчилж байсан бол 2012 онд 242660 хэрэглэгчтэй болжээ. Улаанбаатар хотын хүн амын өсөлтийн улмаас хэ­рэглээний ачаалал эрс нэмэгдэж стан­цууд бүрэн хүчин чадлаа шавхаж бай­гаа учир дэд станцуудыг өргөтгөх, эрчим хүчний ши­нэ эх үүсвэртэй болох хамгийн чу­хал байгааг  тус компанийн удирдлагууд мэдэгдсэн.

       Жилээс жилд нийслэлчүүдийн толгойны өвчин болоод буй  агаарын бохирдлыг бууруулах зорилгоор 2009 оноос гэр хорооллын айлуудад цахилгаан халаагуур олгох болсон. Мөн цахил­гааны шөнийн хэрэглээний тарифыг багасгаж, урамшуулал олгоод байгаа.  Үүнээс шалтгаалж гэр хороол­лын зарим хороонд цахилгааны ачаа­лал 41.3 хувиар өсчээ. Тухайлбал Баян­хошууны айл өрхийг цахилгаа­наар хангадаг ТЭЦ II-ын 35 кВ-ын станцын ачаалал өмнөх оныхоос 41.3, Сонгинохайрхан дүүргийн II-VI хороо Толгойтын эцсээс 65 дугаар сургууль, СХД-ийн захиргаанаас хойшхи гэр хорооллыг хангах дэд станцын ачаа­лал 35.7 хувь өссөн байна. Түүнчлэн Хайлааст, Долоон буудал, Чингэлтэй, Дамбадаржаа орчимд 36.6, Ногоон нуур, Дарь эх, Алтан-Өлгий орчмын цахилгааны ачаалал 31.4 хувиар нэмэгджээ. Гэр хороолол ч гэлтгүй хотын төвд цахилгааны хомсдол үүсэх хэмжээнд хүрээд байгаа гэнэ. Шинээр орон сууц, оффис, томоохон үйлчилгээний төвийн барилгууд хотод сүндэр­лэх болсон. Энэ нь нийслэлийн урд хэ­сэг, зүүн хагасыг цахилгаанаар хангаж буй Өмнөд дэд станц, Олимп дэд стан­цын ачааллыг өмнөх жи­лийн­хээс 23.3 хувиар нэмэгдүүлжээ.

        Өвлийн улиралд эрт харанхуй болдгоос цахилгааны хэрэглээ эрс нэмэгддэг. Үүнээс урьтаж аравдугаар сарын 15-нд багтаан “Улаанбаатар цахилгаан түгээх сүл­жээ” компанийнхан их засвар болон урсгал засварын ажлаа дуусгахаар төлөвлөжээ. Өдрөөс өдөрт өсөн нэмэгдэж буй хэрэглээг хангахын тулд тус компани 8.2 тэрбум төгрөгийн өртөгтэй шинэ тоног төхөөрөмж суурилуулж байгаа юм. Мөн улсын төсвийн 17.8, нийслэлийн хоёр тэрбум төгрөгөөр дэд станцуудын хүчин чадлыг нэмэхээр ажиллаж байгаа гэнэ. Үүнээс зөвхөн шинэ барьсан барилгыг цахилгаан эрчим хүчинд холбоход 8.1 тэрбум төгрөг зарцуулах аж.
 Үүнээс гадна ашиглалтын хугацаа дууссан, 30-35 жил болсон шугам сүл­жээ, дэд станцыг шинэчлэх, Улаанбаа­тар хотын төлөвлөлтөд шугам сүл­жээний төлөвлөлтийг дэлгэ­рэнгүй тусган оруулах шаардлагатай байгаа гэлээ. 

          Өнгөрсөн  онд “Улаанбаатар цахилгаан түгээх сүлжээ” компанид 3000 хэрэглэгч шинээр цахилгаан авах хүсэлт гаргажээ. Харин энэ жил нэмж 2219 хэрэглэгчээс өргөдөл ирээд байгаа гэнэ. Тус байгууллагын хариуцдаг дэд станцуудын 50-иас дээш хувь нь 30-35 жил болж хуучирсан, дээр нь ачаалал бараг 100 хувьд хүрсэн учраас одоогийн байдлаар 1014 хэрэглэгчийг цахилгаанд холбож чаджээ. Иймээс одоогийн хүчин чадлаар нэмж шинэ хэрэглэгчийг хангах асуудал хүнд байгаа аж. Харин Өлзийт хороолол, Яармаг, Шувуун фабрик, Төв цэвэрлэх байгууламж орчимд шинээр цахил­гааны хэрэглэгч болоход асуудалгүй гэлээ.