Орон сууцны 8 хувийн зээлийн сургаар барилгын компаниуд үнээ нэмж байна гэсэн гомдол иргэдийн зүгээс тасрахгүй гарсаар байна. Энэ гомдлын дагуу Барилга, хот байгуулалтын яам, Шударга өрсөлдөөн хэрэглэгчийн төлөө газраас барилгын компаниудад шалгалт хийж, орон сууцны үнээ үндэслэлгүй нэмсэн эсэхийг тодруулсан гэх боловч ердөө 18 компани \яамны судалгаагаар\  метр квадратын үнийг 100.000-300.000 төгрөгөөр нэмсэн, энэ нь тийм ч их өсөлт биш гэж мэдэгдсэн.  Харин ШӨХТГ-аас Монгол банкны хөтөлбөрт хамрагдсан 80м²-аас ихгүй талбайтай  56 орон сууцнуудад шалгалт хийхэд 7 компани л үнээ 100.000-150.000 төгрөгөөр нэмсэн, хуучин орон сууцны үнэ буурч байна  гэсэн тайлбар өгч байсан.  Гэтэл бодит байдал дээр ихэнхи орон сууцны үнэ 20-30 хувиар өссөн үзүүлэлттэй байгаа бөгөөд энэ онд ашиглалтанд орох ёстой орон сууцнууд төлөвлөсөн хугацаанаасаа хоцорч байгаа нь эрэлтийг хөөрөгдөж, үнэ нэмэгдэх бас нэг шалтгаан болж байна.

       Засгийн газраас орон сууцны үнийг тогтворжуулах үүднээс барилгын гол нэрийн материал үйлдвэрлэгч, импортлогчид болон барилгын компаниудад хөнгөлөлттэй зээлийг олгосон.  Ингэхдээ барилгын материал үйлдвэрлэгч, импортлогчдод зээл олгохдоо барилгын материалын үнийг өсгөхгүй, тогтвортой барих хатуу нөхцөл тавьж гэрээ хийсэн ч барилгын компаниудад үнийн тал дээр ямар ч хязгаар тавиагүй. Мөн зээл олгосон компаниудаа байгууллагын үйл ажиллагааны нууц гэсэн шалтгаанаар олон нийтэд зарлаагүй. Түүнчлэн санхүүжилтээр төдийгүй барилгын ажил эрхлэх үйл ажиллагааг нь дэмжиж олон шинэчлэлтийг хийсэн. Тухайлбал, барилгын ажил эрхлэх тусгай зөвшөөрөл олгох журмыг шинээр баталсан, барилгын ажил эхлүүлэх, үргэлжлүүлэх зөвшөөрлийг олгох ажлыг хурдан шуурхай шийдвэрлэдэг болсон гээд олон арга хэмжээ авсан. Үүнээс гадна  Улаанбаатар хотод баригдаж байгаа шинэ орон сууцнуудын дэд бүтцийн асуудлыг нь шийдвэрлэж өгөх зорилгоор энэ ондоо багтааж 200 тэрбум төгрөгийн инженерийн байгууламж барихаар төлөвлөж ажлаа эхлээд байна. Гэвч орон сууцны үнэ шинэ хуучин гэлтгүй өссөөр л байгаа...

         ШӨХТГ, БХБЯам мэдэгдэхдээ, хэрвээ энэ \ипотекийн зээлийн\ хөтөлбөрт хамрагдсан барилгын компаниуд үндэслэлгүй үнээ нэмсэн тохиолдол гарвал цаашид Засгийн газраас тухайн компанитай дахин хамтарч ажиллахгүй,  хөтөлбөрөөс хасна, хуулийн хүрээнд хариуцлага тооцох болно гэж байсан ч өдийг хүртэл ямар нэг арга хэмжээ аваагүй л байна.

Эдгээр үнээ нэмээд байгаа компаниуд нь үндэслэлтэй нэмээд байгаа, эсвэл   тухайн компаниуд хөнгөлөлттэй зээл авч барилгаа барьж байгаа ч төрөөс орон сууцны үнийг хязгаарлах нь зах зээлийг гажуудуулах учраас Монгол улсынхаа эдийн засгийг зөв замаар хөгжүүлэх үүднээс орон сууцны үнээ өөрийн дураар нэмээд байгааг иргэд ойлгохгүй байж мэдэх юм.

Сэтгүүлч Б.Цолмонтуяа