Өнөөдөр Барилгын хөгжлийн төв дээр барилгын ажил эрхлэх тусгай зөвшөөрлийн Нэг цэгийн үйлчилгээний төв албан ёсоор нээлтээ хийлээ. Нээлтийн үйл ажиллагаанд Барилга, хот байгуулалтын сайд Ц.Баярсайхан, БХБЯ-ны Төрийн захиргаа удирдлагын газрын дарга Ц. Доржпалам нарын албаны бусад хүмүүс оролцлоо.

        БХБ-ын сайд : “Манай яам барилгын салбарт үйл ажиллагаа явуулдаг бизнесийн байгууллагуудад төрийн үйлчилгээг аль болох шуурхай хүргэх зорилго тавин ажилладаг. Барилгын бүтээн байгуулалтын ажил  харьцангуй богино хугацаанд үргэлжилдэг учраас төрийн захиргааны зүгээс үзүүлдэг тусгай зөвшөөрөл, бусад зөвшөөрлийг олгох үйлчилгээг богино хугацаанд чанартай гүйцэтгэх зорилтыг тавьсан. Энэ хүрээнд тусгай зөвшөөрлийг олгох эрх үүргийг нэлээдгүй мэргэжлийн төрийн бус байгууллагуудад шилжүүлж байгаа. Тухайлбал, барилгын материалын үйлдвэрлэлийн тусгай зөвшөөрлийг мэргэжлийн ТББ-д, нийтийн аж ахуйн тусгай зөвшөөрлийг Усны үндэсний хороо өөрөө олгож, үнийг тогтоогоод  явах бол геодези кадастрын тусгай зөвшөөрлийг мөн ТББ-д шилжүүлэх ажлыг ойрын үед зохион байгуулна. Мөн төрийн зүгээс олгодог барилгын тусгай зөвшөөрлийн суурь нөхцөлүүдийг нэлээд хөнгөвчилсөн. Ингэснээр тусгай зөвшөөрөл авахад цаг хугацаа алддаг асуудлыг цэгцэлж байна. Түүнчлэн барилгын салбарт ажилладаг мэргэжлийн боловсон хүчнүүдийн мэдээллийн санг нэгтгэн баяжуулж дуусч байна. Цаашдаа энэхүү нэг цонхны үйлчилгээг илүү түргэн шуурхай болгоно. Энэ нь тусгай зөвшөөрөл олгох ажлыг цахим хэлбэрт шилжүүлснээр  аж ахуйн нэгжүүд заавал өөрийн биеэр ирж дугаарлаж зогсох шаардлагагүй болно гэсэн үг” гэлээ.

Б.Цолмонтуяа