Засгийн газрын “Бүтээн байгуулалтын цаг” ээлжит хуралдаанаар   Зам тээврийн сайд А.Гансүх мэдээлэл хийлээ. Түүний мэдээлснээр Дорнод аймгийг нийслэлтэй холбох замын ажлыг зургаан компани гүйцэтгэж, ажлын явц 35 хувьтай байгаа бөгөөд “Насны зам” болон “Чайна жео инженеринг” компаниудын ажлын гүйцэтгэлийн явц хангалтгүй байгааажээ. Мөн  Хөвсгөл аймгийн төвийг нийслэлтэй хатуу хучилттай авто замаар холбох ажил 22 хувьтай байгаа учир тус ажлыг гүйцэтгэж буй “Beak Seok” компанийн гэрээг цуцлахаар болжээ.

           Баянхонгор-Улаанбаатар чиглэлийн авто зам наадмын өмнө ашиглалтад орно гэж байсан ч энэ сарын 24 хүртэл хойшилсон. Салбарын яамныхан ажил урагшлахгүй байгаа шалтгаанаа бороо орж, технологийн горим алдагдсан гэж тайлбарласан ч Ерөнхий сайд Н.Алтанхуяг “Засгийн газар нэг компаний аманд унаж, шахаж шаардаж ажил хийлгэнэ гэж байхгүй. Чадахгүй бол гэрээг нь цуцалж, улаан карт өг. Өөр компаниар гүйцэтгүүлэх боломж байгаа” гээд цаг зуурын бэрхшээл зовлон тоочилгүй иргэдийн эрх ашгийг нэгдүгээрт тавьж, ажлаа цаг хугацаанд нь чанартай дуусгахыг санууллаа.