Нийслэлийн Засаг даргын Тамгын Газрын Хэвлэл мэдээлэл, олон нийттэй харилцах хэлтсээс “Далан давхар”-ыг дурсгалын цэцэрлэгт хүрээлэн болгох асуудлаар олон нийтийн сүлжээ, сайт болон гар утсаар дамжуулан иргэдээс санал асуулга зохион байгуулжээ.  Санал асуулгаднийтдээ 10 мянга гаруй хүн оролцсон бөгөөд эдгээр иргэдийн 85 гаруй хувь нь Дурсгалын цэцэрлэгт хүрээлэн болгохыг дэмжсэн байна.

             Нийслэлээс санаачилж байгаа энэхүү төслөөр Далан давхар буюу “Самбалхүндэв”-ийн оршуулгын газрын 137 га газрыг цэвэрлэн, орон улсын жишигт нийцсэн цэцэрлэгт хүрээлэн байгуулах юм. Төслөөр “Далан давхар”-ын оршуулгын газарт гэрэлт хөшөө бүхий дурсгалын цэцэрлэгт хүрээлэн байгуулахын тулдон удаан жил болсон хуучин шарилуудыг мэргэжлийн баг ухаж чандарлан, дурсгалын цогцолбор, гэрэлт суварга болон бусад суварга барьж чандрыг дотор нь залахаар төлөвлөөд байгаа ажээ.      

          Дурсгалын цэцэрлэгт хүрээлэн байгуулах ажлыг төр, хувийн хэвшлийн түншлэлээр хэрэгжүүлэх бөгөөд Концесийн уралдаан шалгаруулах комиссын хуралдаанаар энэ асуудлаар мэргэжлийн байгууллагуудыг оролцуулсан олон нийтийн хэлэлцүүлэг зохион байгуулахаар шийдвэрлэжээ. Тиймээс нийслэлийн Эдийн засгийн хөгжлийн газраас шашны байгууллагын төлөөлөл, ШУА-ийн эрдэмтэд болон Эрүүл мэнд, байгаль орчин, Ногоон хөгжлийн газар зэрэг байгууллагуудын төлөөллийг хамруулсан хэлэлцүүлэг зохион байгуулахаар болсон байна. Хэлэлцүүлэг маргааш буюу Пүрэв гарагийн 14:00 цагт нийслэлийн Иргэний танхимд болох гэнэ.