Төрийн ордонд даваа гараг бүр зохион байгуулдаг  “Бүтээн байгуулалтын цаг” уулзалт өчигдөр болж өнгөрлөө. Засгийн газрын зарим сайд нар орон нутагт томилолт, амралттай байгаа тул өнгөрсөн 7 хоногийн уулзалт  болоогүй бөгөөд энэ удаагийн уулзалтыг  Шадар сайд Д.Тэрбишдагва даргалан явууллаа. Уг уулзалтанд салбар яам, агентлагийн удирдах албан тушаалтнууд оролцож бүтээн байгуулалтын ажил хэдэн хувьтай явж байгаа,ямар асуудал үүссэн талаар мэдээллээ.
          Барилга, хот байгуулалтын яамнаас найман хувийн хүүтэй орон сууцны зээлийн хөтөлбөр хэвийн үргэлжилж байгаа гэж мэдээлэв. Мөн Засгийн газрын 11-11 төвд ирж буй ихэнхи гомдол нь 80 м.кв-аас дээш хэмжээтэй байрны хувьд уг зээлд хамрагдах боломжгүй байгааг шүүмжилсэн санал давамгайлж байна гэлээ.

           Зам тээврийн салбарт өнгөрөгч долоо хоногийн байдлаар 691 хүн, 296 машин техник ажиллаж нийтдээ 65 км замын ажлыг бүрэн хийж дуусгасан гэнэ. Мөн энэ үеэр аймгийн төвүүдийг нийслэл хоттой хатуу хучилттай замаар холбох ажлын гүйцэтгэлийг танилцуулсан бөгөөд Хөвсгөл аймгийн төвийг холбох замын ажил 15 хувь, Дорноговь, Өмнөговь аймгийн төвийг холбох ажил 23 хувь, Дорноговь аймгийн төв болон  Замын үүдийг нийслэлтэй холбох ажил 69 хувь, Баянхонгор аймгийг нийслэлтэй хатуу хучилттай замаар холбох ажил 97 хувьтай байгаа аж.
Түүнчлэн Налайх, Цонжинболдог руу явах зам засварын ажлыг дуусгаснаар энэ чиглэлийн замын хүндрэл бүрэн арилсан гэв.
        Нийслэлийн хувьд энэ онд хийх бүтээн байгуулалтаас 33 уулзварыг онцлов. Эдгээр уулзваруудаас 6 нь дууссан, 10 дээр нь ажиллаж байгаа бөгөөд үлдсэнийг нь 9 дүгээр сарын 1-ний дотор дуусгах төлөвлөгөөтэй байгаа ажээ.