Гэр хорооллын хөгжлийн газрын дарга Ш.Ганхуяг, Хяналт мониторингийн хэлстийн дарга Ц.Баярмөнх нар Сонгино хайрхан дүүргийн 10 дугаар хорооны нутаг дэвсгэр дэх Арьс ширний үйлдвэрийн нийтийн эзэмшлийн орон сууцны 120, 84 айлын оршин суугч иргэдтэй уулзлаа. 10 дугаар хорооны иргэд нэгдэж гэр хорооллын дахин төлөвлөлтөд хамрагдах хүсэлтээ илэрхийлсэн юм.

      НИТХ-аас баталсан  дахин төлөвлөлт хийх 12 байршилд тус 10 дугаар хорооны хэсэг хамрагдсан. Гэвч дийлэнх байршил, нэгж талбаруудад дахин төлөвлөлтийн үйл ажиллагаа журмын дагуу явагдаж, бүтээн байгуулалтын ажил хэдийнэ эхэлсэн ч тус хороон дээр төлөвлөлтийг хийх аж ахуйн нэгжийн төслийн санал ирээгүй байгаа юм. Учир нь тус хорооны газар нь улсын мэдлийн газар юм. Нэг үгээр бол нийтийн байр гэж хэлж болно

     Арьс ширний үйлдвэрийн байрны оршин суугчидтай уулзах үеэр Гэр хорооллын хөгжлийн газрын дарга дахин төлөвлөлтийг уг байршил дээр төсөл хэрэгжүүлэх, иргэдийг орон сууцжуулах ямар гарц байгааг  судалж байгаа гэлээ. Орчин нөхцлөө сайжруулах, нийгмийн дэд бүтэц бүхий инженерийн шугам сүлжээнд холбогдсон тохилог орон сууцанд амьдрах хүсэлтийг хэрэгжүүлэхийн тулд  иргэдийн оролцоон дээр суурилсан шийдвэр гаргаж дахин төлөвлөлтийг хэрэгжүүлэх шийдлийг олохын төлөө  хамтран ажиллах болно гэлээ.