Чанаргүй барилгын тоо ихсэж, иргэдийг хохирсоор л байна. Монголын барилгын салбарт үйл ажиллагаа явуулж байгаа “үндэсний” компаниудаас гадна дийлэнх хэсгийг Хятад улсын хөрөнгө оруулалттай, хятад удирдлагатай компаниуд эзэлдэг.

    “Кёкюшү”цамхагийнзүүн талд Баянгол дүүргийн 6-р хороо, 10 дугаар хорооллын нутаг дэвсгэрт байрлах 39-р байр гаднаас нь харахад цэвэрхэн, өөлөх зүйлгүй харагдана. Гэвч “гадна гяланцаг, дотроо паланцаг” гэгчээр орцных нь үүдээр ороод л таагүй орчин таныг угтана.

      Энэхүү орон сууц нь 11 давхар 66 айлын сууц бөгөөд одоогоор 30 гаруй айл байраа өмчлөөд авчихсан. Гэтэл ашиглалтанд ороод удаа ч үгүй ус алдаж, крантнаас зэвтэй ус гоожиж, чанаргүй, зориулалтын бус сантехникийн хэрэгсэл, хоолой ашигласанаас болж автомашины зогсоол руу айлуудын бохир урсан орж машин тавих битгий хэл, хүн шагайх аргагүй үнэртэй болсон.

     Анх Хятадын хөрөнгө оруулалттай “Шүнди” компанийн захиалгаар мөн л хятадын хөрөнгө оруулалттай “Зунчин” гэх компани гүйцэтгэгчээр ажилласан байна. Тухайн үеийн “Шүнди” компанийн гүйцэтгэх захирлаар ажиллаж байсан Ван Сан Тун гэгч хятад “Зунчин” гэх компанийн чанаргүй барилгыг ашиглалтанд оруулахын тулд мөн л тухайн үеийн Мэргэжлийн хяналтын коммиссын ахлахаар ажиллаж байсан Барилга хот төлөвлөлтийн газрын ерөнхий инженер Ө.Сүхбаатарт авилгал өгсөнөөр өнөөдрийн нөхцөл байдал үүсчээ.

  Ө.Сүхбаатар гэгч нь чанаргүй, зориулалтын бус сантехникийн хэрэгсэл ашигласан барилгыг ашиглалтанд оруулсаныхаа хариуд тус байрны 2-р орцны 7-н давхрын 3 өрөө байрыг авилгалд авсан нь 3 шатны шүүхээр орж гэм буруутай нь тогтоогдсон. Харин Ө.Сүхбаатартай хуйвалдан чанаргүй барилгыг ашиглалтанд оруулсан тухайн үед “Шүнди” компанийн гүйцэтгэх захирлаар ажиллаж байсан Ван Сан Тун гэгч хятад иргэн нь өршөөлийн хуульд хамрагдаад ямар нэгэн ял шийтгэлгүй өнгөрч чадсан. Харин гүйцэтгэгчээр ажилласан “Зунчин” компани нь “Чанаргүй барилга барьсан гэх” үндэслэлээр хариуцлагаас “мултарсан”.