Барилгын зураг төсөл зохиогчдын холбооноос “Барилгын зураг төслийн чанар-Хяналт-Хариуцлагын тогтолцоо” сэдэвт зөвлөгөөнийг зохион байгууллаа.  Зөвлөгөөнд БХБЯам, МБИХолбоо, Мэргэжлийн хяналтын ерөнхий газар, Нийслэлийн ерөнхий төлөвлөгөөний газар, Барилгын хөгжлийн төв, ХББЗТИнститут  зэрэг газрууд оролцож мэдээлэл хийсэн.

         Мэргэжлийн хяналтын ерөнхий газрын Өргөх механизмын хяналтын улсын байцаагч Н.Буйдан хэлэхдээ алдаатай зураг төслөөс болж өргөх механизмаас үүдсэн осол барилгын салбарт ихээхэн гардгийг онцлоод өнгөрсөн онд 100 гаруй, энэ оны 5 сарын байдлаар гэхэд 70 гаруй осол бүртгэгдсэн гэлээ. Өргөх механизм ашигладаг бусад салбартай харьцуулахад гарч байгаа нийт ослын 80-90 хувь нь барилгын салбарт ногддог байна. Энэ нь зураг төсөл зохиогчдын  кран төлөвлөлтийн норм дүрмээ мэддэггүй, стандартаа уншдаггүй, мэдлэг чадвар сул байгаатай холбоотой гэнэ. Мөн экспертүүд хангалтгүй ажиллаж байгаагаас алдаатай зураг төслийг баталж, үүнээс шалтгаалсан осол аваар их гарч байгааг сануулсан. Түүнчлэн  мэдээлэл холбоо өндөр хөгжсөн өнөө үед интернет, холбооны өрөө, суваг зэргийг огт төлөвлөхгүй байгааг шүүүмжилж байсан юм. 

         НЕТГ-ын Хот байгуулалтын хэлтсийн дарга О.Одбаяр илтгэлдээ: “Энэ оны эхний 5 сарын байдлаар барилгын ажил эхлүүлэх, үргэлжлүүлэх зөвшөөрөл авах тухай 790 хүсэлтээс 560-ыг нь шийдвэрлэсэн. Зарим барилгын зураг төсөл дээр инженерийн шугам сүлжээг тэмдэглээгүй, Googlemap-ээс татаж хэвлээд ирдэг.  Үүнийгээ засаад ир гэхээр алга болцгоочдог. Энэ мэт байдлаас болж зураг төслийн магадлалыг баталгаажуулах ажил удааширдаг. Цаашид зураг төслийн байгууллагын дотоод хяналтыг сайжруулах, ёс зүйг дээшлүүлэх шаардлагатай” гэлээ. 

БХТөвийн дэд дарга Д.Гантулга илтгэлдээ батлагдаагүй зураг төслөөр барилга барих зөрчил их байгаа учраас БХБЯамны сайдын тушаалаар эдгээр барилгуудын зураг төсөлд дахин магадлал хийж байгааг дурьдаад экспертийн сонгон шалгаруулалтыг яам хариуцдаг бөгөөд  шинээр батлагдах хуулиа хүлээхгүйгээр Засгийн газрын 151-р тогтоолтой уялдуулан энэ ажлаа яаралтай зохион байгуулахыг хүслээ.  Мөн тэрээр БХТөв нь экспертүүдээ сүүлийн хэдэн жил сургаж, мэргэжил чадавхийг нь дээшлүүлээгүй нь бидний л алдаа гээд магадлал хийлгэхээр  ирж байгаа зураг төслүүд норм дүрмээ биелүүлээгүй, ирүүлж байгаа материалын бүрдэл дутуу байдаг учир буцаадаг гэсэн тайлбарыг хийсэн.

Эдгээр илтгэлүүдийн дараа зөвлөгөөнд оролцогчдын санал хүсэлт, шүүмжлэлүүд өрнөсөн.  Оролцогчдын дэвшүүлсэн санал хүсэлтийг тоймловол:

·        Барилгын хөгжлийн төв монополь эрхтэй байгаа учраас магадлалын ажлыг мөнгөний төлөө хийж байна.

·        Барилгын зураг төслийн хяналтын тогтолцоо буруу байна. Мэргэжлийн ТББ-уудад магадлал хийх эрхийг нь өгөх хэрэгтэй.

·        Зураг төсөлчдийн чадавхи сул байгаа учир залуу үеэ сургах ажлыг тогтмол зохион байгуулах хэрэгтэй.

·        Магадлалын ажилд хяналтын хуудас нэвтрүүлэх шаардлагатай

·        Зураг төсөл зохиогчдын хариуцлагыг өндөржүүлэхийн тулд буруу зураг төслөөс болж үүссэн бүх хохирлыг зохиогчоор төлүүлдэг болгох

·        Барилга угсралтын ажил батлагдсан зургийн дагуу явж байгаа эсэхийг хянах, шаардлагатай тохиолдолд зогсоох эрхийг зохиогчид өгөх зэрэг хүсэлтүүд гарсан бөгөөд эдгээрийг зөвлөгөөний шийдвэрт тусгаж, холбогдох төрийн байгууллагуудад хүргүүлэхээ БЗТЗХолбооны Ерөнхийлөгч Г.Мягмар амласан.

Зөвлөгөөний төгсгөлд БХБЯамны Барилга, барилгын материалын бодлогын хэрэгжилтийг зохицуулах газрын дарга Б.Цэдэнсамба оролцогчдын асуултанд хариулахдаа :  -“Та бүхний шүүмжлэлийг хүлээж авлаа. Яамны бодлого бол мэргэжлийн ТББ-тай түлхүү хамтарч ажиллах, тэдэнтэй уулзаж зөвшилцөх явдал байдаг. Бидэнд мэдэхгүй зүйл олон байгаа учраас та бүхний санал шүүмжлэл, зөвлөгөөг цаашдаа ч хүлээж авах болно.  Манай орны зураг төслийн байгууллага хараахан бэхжээгүй байгаа. Тиймээс барилгын тухай хуулинд зураг төсөлтэй холбогдох нарийвчилсан заалтуудыг оруулж өгсөн. Тусгай зөвшөөрөл олгох, барилгын ажил эхлүүлэх, үргэжлүүлэх зөвшөөрөл олгох ажлуудыг нэлээн хөнгөвчилсөн. Энэ байдлаар хэсэг хугацаанд явна, гэхдээ хуулиндаа чангатгаж, хумих бодлого барьж байгаа” гэсэн юм.

Сурвалжилсан: Б.Цолмонтуяа