Засгийн газар энэ жил 200 тэрбум төгрөгийг Улаанбаатар хотын дэд бүтцийг шинэчлэхэд зориулна. Цэвэр ус, дулаан, эрчим хүч, инженерийн шугам сүлжээг шинэчлэхэд зориулагдах энэ хөрөнгөөр нийслэлийн шинэ төлөвлөлтийн 12 газар, шинэ суурьшлын бүсийн 10 газарт дэд бүтцийн дээрхи ажил хийгдэх юм.

      Энэ дагуу Барилга, хот байгуулалтын яамны Төрийн нарийн бичгийн дарга Р.Эрдэнэбүрэн, БХБЯ-ны СБТГ-ын дарга Г.Мэргэнбаяр,ХШҮДАГ-ын дарга Ц.Амарбаясгалан нар дэд бүтийн барилга байгууламжийн компаниудын төлөөллийг хүлээн авч уулзлаа.

      Mongolian civil engineering association  буюу Монголын нийгэм ахуйн барилгын холбоо /МНАБХ/ гэж нэрдлэгдсэн ТББ-д Улаанбаатар хотод хийгдэж буй дэд бүтцийн өргөтгөлийн ажлын 90 гаруй хувийг хийж гүйцэтгэдэг 50 гаруй компани нэгддэг юм байна.

     Дээр дурьдсан 200 тэрбум төгрөгийн дэд бүтцийн ажлыг эдгээр компаниуд барьж байгуулах ёстой. Гэвч энэ ажлыг бондын орлогоор санхүүжүүлэх учраас тендер зарлах боломжгүй, тийм цаг хугацаа ч байхгүй учраас Барилга хот байгуулалтын яам Монголын нийгэм ахуйн барилгын холбоотой хамтран гүйцэтгэгчийг шалгаруулахаар өнгөрсөн долоо хоногт шийдвэрлэжээ.

     Өөрөөр хэлбэл, барилгын холбоо нь салбарынхаа компаниудын техникийн хүчин чадал, ажлын туршлага, хүн хүчний талаар илүү бодитой мэдээлэлтэй гэдэг утгаар энэ жилд хийгдэхээр зураг төсөл нь бэлэн болоод байгаа 56 барилгын ажлын аль компани хэнтэй хамтарч гүйцэтгэх талаар саналаа боловсруулаад салбарын яамандаа ирүүлэхийг хүссэн байна.

     Яам дангаараа энэ ажлыг хариуцаж, хувь компаниудын цаасан дээр гаргаж ирүүлсэн мэдээлэлд тулгуурлан гэрээ байгуулах нь нэгдүгээрт эрсдэлтэй, хоёрдугаарт дэд бүтцийн төсөлд зориулагдаж байгаа хөрөнгийн зарцуулалтыг салбарынхнаар өөрсдөөр нь хянуулах нь зөв гэж үзэж байгаа юм.  

     Гэвч долоо хоногийн өмнө хийгдсэн энэ хэлэлцээрийн үр дүн өчигдрийн уулзалтаар лав гарсангүй. Учир нь холбоонд багтсан компаниуд хэн нь ямар ажил гүйцэтгэх, ямар хүчин чадалтай ажиллах, цаашлаад хэн хэдий хэрийн мөнгөн дүнтэй ажил гүйцэтгэх вэ гэдэг дээр нэгдсэн байр суурьт хүрч зохион байгуулалтад орж чадаагүй байна.

      Тиймээс БХБЯ-ны Төрийн нарийн бичгийн дарга Р.Эрдэнэбүрэн “Нэгэнт хугацаа тулсан, та нар өөрсдөө зохион байгуулалтад орж чадаагүй учраас яам дангаараа компаниуддаа урилгаа явуулаад гэрээ байгуулаад ажлаа хийлгэхээс өөр аргагүй. Монгол банкнаас хийгдэх бондын санхүүжилт 14 хоногийн дотор гарах ёстой учраас одоо зохион байгуулалтад орж чадаагүй байгаа танай холбоог хүлээх боломжгүй боллоо” гэдэг анхааруулгыг өгсөн юм.  Харин үүний дараа зарим компанийн зүгээс “Урилгаа явуулахдаа компаниуд хоорондоо хамтарч оролцох боломжтой, нээлттэй байдлаар хандвал сайн байна” гэдэг хүсэлт тавьсан.

     Түүнчлэн яамнаас ажил гүйцэтгэгч нарт сануулсан бас нэг гол зүйл бол “Төслийн баг болон яамны албан тушаалтнуудын зүгээс ямар нэг байдлаар энэ төслөөс хувь хүртэх гэсэн, авлига шаардсан тохиолдол гарах юм бол /урьд өмнө тендер явуулж байсан жишгээр/ тэр даруйд нь мэдээлэл өгч бай, хуулийн дагуу хариуцлага тооцуулах болно. Энэ 200 тэрбумын санхүүжилтийн төгрөг нэг бүр нь зөвхөн бүтээн байгуулалтын ажилд зарцуулагдах ёстой” гэсэн юм. Үүнд хяналт тавих үүргийг БХБЯ-ны Хяналт, шалгалт үнэлгээ дотоод аудитын газрын дарга Ц.Амарбаясгаланд даалгалаа.