Энэ оны 9-р сардБНБУ-ын Засгийн газрын тэргүүн манай улсад айлчлал хийх гэж байна.  Энэ айлчлалын өмнө хоёр улсын Засгийн газар хоорондын комиссын анхдугаар хуралдааныг 8-р сард багтаан хуралдуулах талаар БХБ-ын дэд сайд, ЗГХК-ын Монголын хэсгийн дарга Г. Байгалмаа, БНБУ-ын Аж үйлдвэрийн дэд сайд, ЗГХК-ын Беларусийн хэсгийн дарга С.Огородников нар ярилцлаа.

    Барилга, хот байгуулалтын дэд сайд, ЗГХК-ын Монголын хэсгийн дарга Г. Байгалмаа барилга, хот байгуулалтын салбарын байдал, яамны бодлогын талаар танилцуулж, энэ салбарт хамтарч ажиллах боломжуудын талаар мэдээлэл өглөө.

     Хоёр улсын хооронд1990 оноос хойш харилцаа, хамтын ажиллагаа тасрахад хүрээд байна.  Ялангуяа худалдааны эргэлт эрс буурсаныг тэмдэглэлээ.  Харин сүүлийн жилүүдэд Беларусийн хөрөнгө оруулалт нэмэгдэж байна.  2011 онд 314 900 ам долларын хөрөнгө оруулалт орж ирсэн бол 2012 онд энэ тоо 684 960 ам доллар болжээ.  Худалдаа эргэлтийн тухайд 2011 онд 72 250 900, 2012 онд 129 363 500 ам доллар болж тус тус өсөж байгаа. Гэвч энэ нь Беларусаас манай оруулж ирж байгаа импорт юм.  Өөрөөр хэлбэл манай улс өнөөдөр тус улсад экспортоор бараа гаргаагүй байна.  Иймээс худалдааны эргэлтийг харилцан хөгжүүлэх хүсэлтэй гэдгээ илэрхийллээ.

    Беларусийн трактор, хөдөө аж ахуйн техник тоног төхөөрөмж Белаз, Маз-ыг Монголчууд  атрын аяндаа хэрэглэж ирсэн түүхтэй.  Саяхан Үйлдвэр худалдаа, хүнс хөдөө аж ахуйн сайд,  Гадаад харилцааны дэд сайд Беларус улсад айлчлал хийсэн нь харилцаа, хамтын ажиллагаа сэргэхэд нөлөө үзүүлнэ гэдэгт найдаж байна гэж Г. Байгалмаа хэлэв.

     Манай улсын хувьд хөдөө аж ахуйн салбартаа Беларусийн машин механизмийг, барилгын салбарт лифт, түүнчлэн боловсон хүчин бэлтгэх тал дээр хамтарч ажиллах сонирхолтой байдгаа тэрээр онцоллоо.

    БНБУ-ын Аж үйлдвэрийн дэд сайд,ЗГХК-ын Беларусийн хэсгийн дарга С.Огородников уул уурхай, зам тээвэр, боловсрол, барилга хот байгуулалт гээд олон салбарт хамтарч ажиллах сонирхолтой яваагаа дуулгалаа. Беларусийн Ерөнхий сайдын айлчлалын хүрээнд  зохион байгуулагдах үзэсгэлэн яармагийг үр дүнтэй, хоёр орны хувийн хэвшлийнхэний түншлэлийг ойртуулсан арга хэмжээ болгохоор зорьж байгаагаа хэллээ.

    Монголын үндэсний худалдаа аж үйлдвэрийн танхимын үзэсгэлэнгийн гадна талбайд том оврын машин механизм, техник тоног төхөөрөмж байрлуулах боломж дээр дэмжлэг туслалцаа үзүүлэхийг ЗГХК-ын Монголын хэсгийн дарга Г. Байгалмаагаас хүссэн юм.

     Хоёр орны харилцаа, хамтын ажиллагааны чиглэлийг ярилцаж, ЗГХК-ын анхдугаар хуралдааны товыг ярилцсан энэ хуралд Барилга, хот байгуулалт, Гадаад харилцаа, Эдийн засгийн хөгжлийн яамны холбогдох газар, хэлтсийн удирдлагууд оролцлоо.