Энэ онд ашиглалтанд орох барилгуудад зээл өгнө
Засгийн газраас барилгын салбарыг дэмжиж барилгын материал үйлдвэрлэгч болон импортлогчдод, барилгын компаниудад, мөн иргэдэд орон сууцны хөнгөлөлттэй зээлийг олгохоор болсон. Одоогийн байдлаар барилгын материал импортлогчдод жилийн 7 хувийн хүүтэй, 1 жилийн хугацаатай, нийт 265 тэрбум төгрөгийн зээл, барилгын материал үйлдвэрлэгч аж ахуйн нэгжүүдэд 5.5 хувийн хүүтэй, нийт 64 тэрбум төгрөгийн зээлийг олгож эхлээд байна.
Харин орон сууцны нийлүүлэлтийг дэмжиж энэ онд ашиглалтанд орохоор байгаа гүйцэтгэл нь дуусаагүй барилгуудад зориулж жилийн 7 ба 5.5 хувийн хүүтэй, 18 сарын хугацаатай, нийтдээ 300 тэрбум төгрөгийн зээлийг олгохоор болсон. Энэхүү зээлийн эх үүсвэр шийдэгдэж ХААН, Худалдаа хөгжлийн банк, Улаанбаатар, Голомт гэсэн арилжааны банкуудад байршуулаад байна. Барилгын компаниуд эдгээр арилжааны банкуудад хандаж зээлийн материалаа бүрдүүлэн, тухайн банкнаас тавих шаардлагыг хангасны үндсэн дээр зээлээ авах боломжтой бөгөөд Барилга, хот байгуулалтын яамтай давхар гэрээ хийх шаардлагагүй гэнэ.
Иргэдэд олгох орон сууцны моргейжийн зээлийн журам маргаашийн Засгийн газрын хуралдаанаар батлагдана гэж албаны эх сурвалж мэдээллээ. Уг журам батлагдвал иргэд жилийн 8 хувийн хүүтэй, 20 жилийн хугацаатай хөнгөлөлттэй зээлийг зөвхөн бүрэн ашиглалтанд орсон орон сууцыг барьцаалан, 30 хувийн урьдчилгаа төлөөд авах боломжтой. Орон сууцны моргейжийн зээлэнд зориулж нийт 800 тэрбум төгрөгийг шийдвэрлээд байгаа бөгөөд тус зээлэнд хамрагдахын тулд заавал төрийн албан хаагч, эсвэл анх удаа орон сууц авч байгаа иргэн байх шаардлагагүй юм.