Дахин төлөвлөлт хийх гэр хорооллын дэд бүтцийг шийдэж эхэлж байна
Нийслэлийн гэр хорооллыг барилгажуулахад дэд бүтэц, эрчим хүчний эх үүсвэрийг нэн түрүүнд шийдвэрлэх шаардлагатай. Иймээс Улаанбаатар хотын цахилгаан хангамжийн төлөвлөлт төслийн хүрээнд нийслэлийг тойрсон 110 квт-ийн цахилгаан дулаан, агаарын шугам барьж байгуулахаар болж өндөр хүчдэлийн эхний анкерийг босголоо.
Улаанбаатар хотод цахилгаанд холбогдоогүй 8000 айл өрх бий. Цахилгаан дулааныг сайжруулах төсөл хэрэгжсэнээр хотын захын гэр хорооллын иргэд эрчим хүчинд холбогдохын зэрэгцээ нийслэлийн 7, 14-р хороолол, МҮОНРТ орчмын орон сууцны хорооллын цахилгаан, дулаан, дэд бүтэц шийдэгдэх юм.
Эрчим хүч, орон сууцны дэд бүтцийн томоохон бүтээн байгуулалтын ажил болох өндөр хүчдэлийн шугамыг энэ онд багтаан ашиглалтанд хүлээлгэн өгнө гэж Эрчим инженеринг компаний удирдлагууд мэдэгдсэн.
Гэр хорооллын уул дамжин босох өндөр хүчдэлийн шугам барихад газар чөлөөлөлт хүнд байгааг гүйцэтгэгч нар ярьж байлаа. Бүтээн байгуулалтын энэ ажлыг хийхийн тулд 183 айлын газрыг чөлөөлөх шаардлага тулгарч байгаа юм.