100.000 айлын орон сууц хөтөлбөрийн дарамт үргэлжилсээр...
Иргэдээ 6 хувийн хүүтэй зээлэнд хамруулж орон сууцтай болгоно гэсэн үлгэр олон хүнийг хүнд байдалд оруулав. Бэлэн мөнгөөр байр авч чадахгүй иргэдийн хувьд бага хүүтэй, урт хугацаатай зээлээр орон сууцтай болно гэдэг алдаж болохгүй алтан боломж шиг л санагдсан. Гэтэл ганцхан жилийн настай энэ хөтөлбөрийг Засгийн газар анхнаасаа сонгуулийн шоу байсан, цаашид хэрэгжих боломжгүй гэдгийг зарлалаа. Харин уг үлгэрт итгэж байдгаа байрны урьдчилгаанд өгсөн иргэд яахаа мэдэхээ байгаад дэмий л нэг жагсаал хийгээд тарав.
Гэрээ хийсэн барилгын компаниуд нь үлдэгдэл мөнгөө нэхээд, дээрээс нь метр квадратынхаа үнийг нэмчихээд зөрүүг нь төл гэж дарамтлаад байгаа сурагтай. Тухайлбал, Дако ХХК 100.000 айлын орон сууц хөтөлбөр хэрэгжихгүй болсонтой холбогдуулан өмнө гэрээ хийсэн бүх айлуудтайгаа гэрээгээ цуцалж байгаа гэнэ. Ингэхдээ үлдэгдэл мөнгөө яаралтай хугацаанд төлбөл анх гэрээ хийсэн үнээр буюу 1.550.000 мянгаар бодож өгөх боломжтой. Харин ингэж чадахгүй бол нэг бол гэрээгээ цуцлаад бүтэн жил үр ашиггүй хадгалуулсан мөнгөө буцааж авах, эсвэл одоо нэмэгдсэн үнээр буюу 1.700.000 мянган төгрөгөөр бодож төлбөрөө хийгээд явах гэсэн сонголтыг тулгаж байна. Богино хугацаанд 20-30 сая төгрөг гаргаад өгөх боломжтой байсан бол зээлэнд хамрагдах хүсэлт гаргаж, энэ компанитай гэрээ хийх хэрэг юун.
Байр, орон сууцтай болох гэсэн иргэдийн хүслээр далимдуулж Төр засаг нь нэр төр хөөж хуурч мэхэлнэ, компаниуд нь ашигийн төлөө илүү харж билүү долооно. Иргэдэд өгөх 7-9 хувийн хүүтэй зээлийн сургаар энэ онд ашиглалтанд орох барилгууд аль хэдийн үнээ нэмээд эхэлсэн нь эндээс харагдаж байна. Заавал бүрэн ашиглалтанд орсон барилгад зээл өгнө гэсэн нь одоо бэлэн байгаа болон удахгүй баригдаж дуусах барилгуудад үнээ нэмэх гол шалтгаан болсон. Хуучин байр сонгож зээл авч болох ч насаараа амьдрах орон гэр нь болох учир хүмүүс шинэ орон сууцыг сонирхох нь лавтай. Иймээс л орон сууцны эрэлтийг давах хангалттай тооны ашиглалтанд орсон барилга байхгүй учир хүссэн хүсээгүй эдгээр тэнгэр хадсан үнэтэй орон сууцнаас сонгож таарна. Зах зээлийн хууль гэж л энэ байх даа.