Барилгачдын талбайгаас
Барилгачдын талбайд цэцэг жимс, мод бутны үр суулгацын үзэсгэлэн худалдаа явагдаж байна. Эндээс зүлэг, төрөл бүрийн цэцэг, хүнсний ногоо, жимс жимсгэний тарьц суулгацыг их хэмжээгээр авах боломжтой. Онцлоход энд байгаа хүнсний ногоо, цэцэгний үр дандаа ОХУ-аас оруулж ирсэн юм билээ. Цэцэгний үрийн хувьд төрлөөсөө шалтгаалаад янз бүрийн үнэтэй л байна. Харин үхрийн нүдний бут 20.000, чацарганы суулгац 25.000 гэсэн. Орон сууц, хашааныхаа гадна орчныг цэцэрлэгжүүлэх хүсэлтэй хувь хүмүүс, албан байгууллагуудад дуулгахад энэхүү үзэсгэлэн худалдаа энэ сарын 25-ыг дуустал үргэлжлэх юм билээ.
Өмнөх жилүүдэд хүмүүс улаан лооль, өргөст хэмх зэрэг хүнсний нарийн ногоог ихэвчлэн сонирхож авдаг байсан бол энэ жил ногоон ургамал, цэцэгний үр ихээр зарагдаж байгаа гэнэ. Нэг ч гэсэн мод тарьж хотынхоо өнгө үзэмжинд хувь нэмрээ оруулах хүсэлтэй иргэд олон болж байгаад би л хувьдаа баяртай байна.
Орон сууцны иргэд заавал СӨХ-өөс, хорооноос зохион байгуулах ёстой гээд хараад суухгүй өөрснөө санаачлаад барилгынхаа гадна орчинг тохижуулж яагаад болохгүй гэж. Гэр хорооллын иргэдэд хашааныхаа хоосон талбайд мод бут тарих боломж өчнөөн бий. Ногоон орчин, цэцэрлэгт хүрээлэн дунд амьдрахын тулд ердөө л санаачлага гаргацгаая.
