Дотоодын үйлдвэрээ ч дэмжинэ, хотоо ч тохижуулна
Нийслэлийн удирдлагууд дотоодын үйлдвэр эрхлэгчдээ дэмжиж ажиллах бодлого баримталж байгаа. Үүний дагуу нийслэл хотынхоо бүтээн байгуулалт, тохижилтын ажилд дотооддоо үйлдвэрлэсэн бүтээгдэхүүнийг ашиглаж байна.Тухайлбал хотын төвийн гудамж, талбайд тавигдсан энгийн, дахивар хогийг ялгах тасалгаатай хогийн сав, модон сандлыг манайхан өөрсдөө үйлдвэрлэжээ. Өнөөдрийн байдлаар “Мега Локоматив” ХХК 345 сая төгрөгийн өртөгөөр 1215 ширхэг хогийн сав, “Түмэн төмөрт” ХХК 150 сая төгрөгөөр 400 ширхэг модон сандлыг үйлдвэрлэж, гудамж талбайд байрлуулаад байна. Энэ нь урьд жилүүдэд урд хөршөөс оруулж ирдэг байсан хогийн савнаас нэг бүрийн үнэ нь 100,000 төгрөгөөр хэмнэсэн зардал болж байгаа гэдгийг албаныхан онцолсон. Цаашид ч нийслэл хотын тохижилт бүтээн байгуулалтын ажилд дотооддоо үйлдвэрлэх боломжтой бүтээгдэхүүнүүдийг бүрэн ашиглаж, үндэсний үйлдвэрлэгчдээ дэмжин, төсвийн зардлаа хэмнэж ажиллана гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.