Нийслэл гэр хороололгүй болсон цагт төслийн хугацаа дуусна
Нийслэлийн гэр хорооллын дахин төлөвлөлтийн төслийн хэрэгжилтийн талаар Гэр хорооллын хөгжлийн газрын Орлогч дарга М.Гантулгатай ярилцлаа.
- Гэр хорооллын дахин төлөвлөлтийг хэрэгжүүлэх компаниуд эцсийн байдлаар шалгарсан уу? Одоогийн байдлаар ямар ямар компани аль байршилд төсөл хэрэгжихээр шалгараад байна вэ?
- Эцсийн дүн гараагүй байна. Энэ сарын 24-нд шалгаруулалтын дүнг олон нийтэд зарлана. Шалгаруулалт бүрэн дуусаагүй байгаа учраас одоогийн байдлаар тодорсон компаниудын нэрийг зарлах боломжгүй.
- Шалгаруулалтын ажил яагаад ингэж удаашраад байна вэ?
- Иргэдтэй газрын үнэ дээр тохиролцож чадахгүй байгаагаас хүндрэл үүсээд байна. 0.5 га газраа 350 саяар үнэлэх, нэг хашаагаа 3,4 байраар солих болзол тавьж байгаа хүмүүс бий. Энэ мэт байдлаас болоод барилгын компаниудын иргэдтэй гэрээ хийх явц удаашраад байна. Барилга барих газраа хэт өндөр үнээр авбал ямар ч ашиг гарахгүй учраас зарим компаниуд өөрснөө төслөөс татгалзах тохиолдол ч байгаа.
- Иргэд дэмжээгүй бол тухайн байршилд дахин төлөвлөлт хийхгүй гэсэн. Тэгвэл тэдгээр иргэдэд цаашид ямар шаардлага тавих вэ? Хөрсний бохирдол, утаа гээд л асуудлууд тэнд хэвээр үлдэх болчлоо.
- Иргэд дэмжихгүй л бол тэнд төсөл хэрэгжихгүй. Иргэдийн хүсэлтийн дагуу энэ ажил хийгдэх ёстой. Хэрвээ иргэд амины орон сууцаа бариад амьдарна гэвэл тодорхой хэмжээний шаардлага тавина. Өөрийн эрх ашгийн төлөө иргэдийг үймүүлээд байгаа цөөн хэдэн хүн бий. Цөөн хэдэн хүний эрх ашгаас болж нийтээрээ бохирдсон хөрсөн дээр утаан дунд амьдарч болохгүй биз дээ. Тухайлбал Гандангийн дэнжийн төв хэсэгт байгаа нэг хэсэг айл зөвшөөрөөд дэд бүтэцтэй тохилог орчинд амьдрая гэтэл захын хэсэгт байдаг нөгөө хэсэг нь хүсэхгүй бол тийшээ инженерийн шугам очих ямар ч боломжгүй болно гэсэн үг. Энэ байдлыг иргэдтэй уулзахдаа тайлбарлаж хэлсэн. Зарим нь ойлгож хүлээж авч байна, ойлгохгүй байгаа хүмүүс ч байна. Пума констракшн бол өчнөөн жил барилга барьсан туршлагатай компани. Эко констракшн сайн муугаараа дуудуулдаг ч гэсэн бүтээн байгуулалт хийгээд явж байгаа Монголын барилгын компани. Энэ мэтчилэн чадвартай барилгын компаниуд төсөл хэрэгжүүлье гээд очиход та нар хэрэггүй ээ, бид орон сууцанд амьдрахгүй гээд явуулж байгаа хүмүүс рүү дахиад өөр ямар компани явуулахаа мэдэхгүй байна. Хятадын компани оруулж ирээд төсөл хэрэгжүүлэлтэй нь биш.
- Дахин төлөвлөлтийн төслийн талаар иргэд хангалттай ойлголтгүй байна гэсэн гомдол гараад байгаа. Иргэдэд сурталчилан танилцуулах ажлыг зөвхөн төсөл хэрэгжүүлэхээр санал өгсөн компаниудад даатгаад орхисон юм биш үү?
- Мэдээлэл бол хангалттай хүрч байгаа. Хэвлэл мэдээллийн хэрэгслээр өдөр бүр л гэр хорооллын дахин төлөвлөлтийн төслийн талаар ярьж байна. Иргэд өөрсдийн амьдралын асуудлыг шийдэж байгаа учраас идэвхитэй оролцох ёстой. Гэвч зарим нэг хутган үймүүлэгчдээс шалтгаалаад бид газраа өгөхгүй, өгвөл хэдэн зуун саяар зарна. Эсвэл 3-аас 4 өрөө байраар солино, үгүй бол өөрсдөө амины орон сууцаа барина гээд хүндрэл үүсгээд байна. Иргэд өөрсдөө хамтраад амины орон сууцны хотхон барьлаа гэхэд ямар их зардал гарахыг тооцоолж мэдэхгүй байна л даа. Шинэчилсэн зохион байгуулалт хийгээд, амины сууцны хотхон барихын тулд тэнд байгаа бүх айлууд шилжиж нүүх хэрэгтэй болно. Тэгж байж инженерийн шугам сүлжээ тавина, гудамж гаргана. Гэтэл бүх айлууд нэгэн зэрэг нүүж чадах бил үү гэдэг том асуудал. Мөн тэнд барих амины сууц нь дулааны алдалгүй, орчин үеийн байшин байх ёстой. Нийслэлээс дулааны шугамыг айл болгон руу татаж өгөх боломжгүй, ерөнхий нэг шугам л тавина. Энэ ерөнхий шугамнаас айлууд холболтоо хийлээ гэхэд хичнээн хэмжээний зардал гарах вэ гэдгийг бас бодолцох ёстой. Шугамаа холбоод, сууцаа барьлаа гэж бодъё. Гэтэл нэг айлд ногдох дулаан ашиглалтын зардлыг тооцоод үзэхэд одоогийн дундаж орлоготой айлын хувьд үнэхээр хүнддэхээр тоо гарч байгаа юм. Тиймээс амины орон сууцны хороолол гэж хошуурахгүйгээр нөхцөл байдалдаа тааруулаад нийтийн орон сууцтай болох ажлыг дэмжих хэрэгтэй байна.
- Гэр хорооллыг орон сууцжуулах төслийн нэг хүндрэлтэй тал нь цахилгаан, дулаан гэх мэт дэд бүтцийн асуудал байгаа. Үүнийг шийдвэрлэх ажил ямар шатанд явж байгаа вэ?
- Цахилгаан, дулаан, инеженерийн шугамын ажил одоогийн байдлаар зураг төслийн шатандаа явж байна. Зураг төслийн тендер зарлагдах гэж байгаа. Ер нь бол дахин төлөвлөлтийн төсөл хэрэгжүүлэх компаниуд нь зураг төслөө боловсруулаад, гүйцэтгэлээ хийгээд явна. Зөвхөн дахин төлөвлөлтийн ажил гэлтгүй Гудамж төсөл, хотоос хэрэгжүүлж буй бусад зам засвар, дэд бүтцийн байгууламжийн ажлууд эхнээсээ хийгдээд явж байгаа.
- Гэр хороололд барилга барих гэхээр хөрсний бохирдол гэж асуудал гарч ирээд байгаа. Энэ асуудлыг яаж шийдэх вэ?
- Энэ талаар яригдаж байгаа. Жишээлэхэд Гандан орчмын хөрсний бохирдол үнэхээр том асуудал болоод байгаа нь нууц биш. Тэр орчинд хэдэн зуун жил айл амьдарч ирсэн болохоор бохирдол дээд цэгтээ хүрсэн. Тэгэхээр тухайн хэсэгт хөрсний ариутгал хийх, эсвэл хотоос гаргаж булах асуудал яригдаж байна.
- Энэ төслийн хугацаа хэзээ дуусах вэ?
- Нийслэлийн гэр хороолол байхгүй болох хүртэл үргэлжилнэ.
Ярилцсан Б.Цолмонтуяа