Монголын Бетон Судлалын Холбоо, ШУТИС,  Америкийн Бетоны Институтын Монгол дахь салбар хамтран “Бетоны олон улсын XII хурал”-ыг 6 сарын 21-нд нийслэл хотноо зохион байгууллаа. Энэ жилийн хурал дэлхий нийтийн анхаарлын төвд байгаа байгаль  орчины тэнцвэртэй байдлыг хадгалах, байгальд ээлтэй бүтээгдэхүүн үйлдвэрлэхтэй холбоотойгоор “Эко бетон”  сэдвийн дор зохиогдсон юм. Хуралд  Монгол, АНУ, Солонгос, Япон зэрэг орны эрдэмтэн судлаачид, барилгын байгууллагын төлөөлөгчид оролцож, эко бетон, өндөр үзүүлэлттэй бетон, орчин үеийн дэвшилтэт материал, бүтээц,  өнөөгийн бетон судлалд гарч буй дэвшилтэт технологи, үйлдвэрлэлд  тулгамдаж буй  асуудлуудаар илтгэл тавьж  хэлэлцлээ.

Барилгын чанар, түүний гол араг яс нь бетоны чанараас шалтгаалдаг.  Тийм ч учраас энэ хурлын ач холбогдол , хамрах хүрээ жилээс жилд нэмэгдэж байна. Энэ жил энэ чиглэлээр суралцаж байгаа оюутнуудын дунд эрдэм шинжилгээний хурал зохион байгуулагдаж, тэдгээрийн илтгэлийг мөн хурлын үеэр танилцуулсан юм. Мөн бетоны олон улсын хурлыг Монголд анхлан зохион байгуулсан АНУ-ын эрдэмтэн M.R.Hansen хүрэлцэн ирж, илтгэл тавьж оролцлоо. Хурлын үеэр барилга утгсралт болон барилгын материалын чиглэлээр практикт нэвтэрч буй техник, технологи, бүтээгдэхүүнээ байгууллагууд танилцуулсан юм. Хурлыг өнгөрсөн жилийн бетоны олон улсын бага хурлын ерөнхий ивээн тэтгэгчээр ажиллаж байсан Премиум Конкрит,  MSM, BASF компаниуд ивээн тэтгэж оролцлоо. 

Мэргэжлийн бус хүний нүдээр харахад хүрээлэн буй орчинд үзүүлж буй нөлөөллийг бууруулах бетоны технологийн асуудлыг гадаадын улс орнуудад хэрхэн шийддэг туршлагыг түлхүү судлах, хаягдал бетоныг байгалийн дүүргэгчийн оронд ашиглах, Монголын үнсийг ашиглан илүү бат бэх, ногоон бетон үйлдвэрлэж байгаль дэлхийдээ ээлтэй, хог хаягдлыг бууруулсан, дахин ашиглах чиглэлээр хийсэн судалгааны ажлуудыг үйлдвэрлэлд нэвтрүүлээсэй гэсэн сэтгэгдэл төрсөн юм.