Удахгүй болох Бетоны Олон Улсын XII бага хурлыг угтан энэ чиглэлээр суралцаж байгаа оюутнуудын дунд “Эко Бетон” сэдэвт оюутны  тэмцээнийг  ШУТИС,  American Concrete Institute, Монголын Бетоны Холбоо хамтран зарласан бөгөөд 6 сарын 14-ны өдөр шалгаруулалт болсон юм. 

Барилгын араг яс болсон бетон, түүний түүхий эдтэй холбоотой онолын  мэдлэгийг  баталгажуулах, бүтээлч сэтгэлгээг хөгжүүлэх, практик хэрэглээтэй холбох чадварыг оюутнуудад олгох зорилготой тэмцээнд ШУТИС-ийн БИАС, ДТС,  МТСургуулийн бакалавр болон магистрантурт суралцаж байгаа оюутнууд оролцсон юм.

БИС-ийн ББЭТ-ийн III дамжааны оюутан  Г.Хангай, Д.Золжаргал, Д.Булган, Д.Эрдэнэбаатар нарын “Хаягдал шил ашиглан барилгын дулаалгын материал-хөөсөн шил гаргах авах судалгаа” тэргүүн байранд  шалгарчээ.

Тэмцээнийг зохион байгуулагч, Барилгын материалын технологийн багийн тэргүүлэх профессор, доктор Д.Сүнжидмаатай уулзаж цөөн хором ярилцсан юм.

Тэрээр:

"Дэлхий нийтийн тулгамдсан асуудал болоод байгаа  экологийн тэнцвэрт байдлыг хангах хэрэгцээнд тулгуурлан хүрээлэн буй орчиндоо  ээлтэй, эрчим хүчинд хэмнэлттэй  бүтээгдэхүүн үйлдвэрлэлийг нэмэгдүүлэх,   хог хаягдлыг бууруулах,  дахин  хэрэглэх  эко шийдлийг гарган авах зорилгоор “Эко Бетон” сэдвийн дор энэ удаагийн тэмцээнийг зохион байгууллаа.

Тэмцээн жил бүр, тулгамдсан сэдвүүдийн дор зохион байгуулагдана. Энэ жилийн тэмцээний байр эзэлсэн бүтээлүүд  Олон Улсын бетоны XII хурлын үеэр оролцогчдод танилцуулагдана гэдгээрээ онцлогтой.  2012 оны бетоны Олон Улсын Хурлын ерөнхий ивээн тэтгэгч Премиум Конкрит  ХХК болон  MSM,  BASF  зэрэг салбартаа тэргүүлэгч компаниуд оюутнуудын бүтээлийг  өндрөөр үнэлж байгаад оролцогч оюутнуудынхаа өмнөөс талархал илэрхийлэе гэсэн юм."

Ж.Оюунчимэг