Орон сууцны 8 хувийн зээлэнд хамрагдах хүсэлтэй иргэд өр төлбөргүйг тодорхойлох лавлагааг  Шүүхийн шийдвэр гүйцэтгэх ерөнхий газраас авч зээл авах арилжааны банкинд хүргүүлэх шаардлагатай болсон. Үүнээс шалтгаалж ШШГЕГазар лавлагаа авах гэсэн хүмүүсийн хөлд дарагджээ.  Ингээд лавлагаа олгох ажил газар дээр ямар байдалтай байгаа талаар ШШГЕГазрын Мэргэжлийн удирдлагын хэлтсийн дарга, хошууч Б.Батболдоос тодрууллаа.

-  Орон сууцны 8 хувийн зээл олгож эхэлсэнтэй холбогдон иргэд ШШГЕГ-аас өр төлбөргүйг тодорхойлох лавлагаа авах болсон. Одоогийн байдлаар хичнээн иргэн лавлагаа аваад байна вэ? Ачаалал хэр зэрэг байна?

- Манайхаас энгийн үед өдөртөө 50-100 хүний лавлагааг ямар нэг хүндрэлгүй гаргаж өгдөг.  Харин энэ долоо хоногоос орон сууцны ипотекийн зээл олгож эхэлсэнтэй холбогдуулан лавлагаа авах авах иргэдийн тоо ихэсч, ачаалал эрс нэмэгдсэн. Өдөрт дунджаар 1500 иргэний лавлагааг олгож байгаа.  Нэг хүний лавлагааг 3-4 цагийн хооронд багтааж олгож байна.  Зөвхөн нийслэлд гэлтгүй хөдөө орон нутагт ачаалал ихэссэн. Орон нутгийн иргэдийн лавлагааг бид онлайнаар олгож байна. Орон нутагт зөвхөн өчигдөр гэхэд 1000 иргэний лавлагаа олгосон бол өнөөдөр 12 цагийн байдлаар 300 хүний хүсэлт ирээд байна.

- Иргэдэд чирэгдэлгүй үйлчлэх, ачааллыг багасгах талаар ямар арга хэмжээ авч байна вэ?

- Манайд лавлагааны ажилтан нэг л байдаг. Харин  ачаалал нэмэгдсэнээс шалтгаалж бид нэмж 22 хүнийг лавлагаа олгох ажилд дайчлаад байна. Мөн уртасгасан цагаар буюу оройн 23 цаг хүртэл ажиллаж эхлээд байгаа. Өмнө нь өр төлбөргүйг тодорхойлох лавлагаа авах гэж банк, манайх гэсэн хоёр газар очдог байсан бол одооноос нэгдсэн журмаар ганц газраас авдаг болсон. Харин одоогийн энэ ачааллыг багасгах үүднээс Монголын банкуудын холбоонд Удирдах газраас албан тоот хүргүүлсэн. Энэ нь банкууд манайх руу зээл хүссэн иргэдийн мэдээллийг явуулаад лавлагааг нэгдсэн журмаар цахим хэлбэрээр авдаг болох тухай юм. Одоогийн байдлаар банкуудаас ямар нэг хариу ирээгүй байна.

- Сая зарим хүмүүсийг материалаа нэгдэх өдрөөс ирж ав гээд буцааж байгаа харагдсан. Ямар хүмүүсийн лавлагаа тэгж удаж гараад байна вэ?

- Энэ долоо хоногийн 1 дэх 2 дахь өдрүүдэд харьцангуй гайгүй байсан ч өчигдрөөс лавлагаа авах хүмүүсийн тоо эрс нэмэгдчихлээ. Бид лавлагаа хүссэн иргэдийг арав арваар нь таслаж материалыг нь хүлээн аваад эхний 300 хүнийг үдээс хойш, дараагийн 300 хүнийг оройн 5 цагаас гэх зэргээр зохион байгуулж олгож байгаа. Зарим иргэд бэлэн болсон лавлагаагаа цагтаа ирж авахгүй байгаагаас олон материал дундаас ахиж шүүж олгох гэж цаг алдах хүндрэл гарч байна. Мөн нэг хүн ганцхан өөрийн лавлагааг биш хамаатан садан, найз нөхөддөө лавлагаа авах гээд өчнөөн бичиг баримт бариад ирдэг. Нэг хүн 24 хүний лавлагаа авах гээд ирсэн тохиолдол бий. Бид энэ олон хүний материалыг өдөртөө багтааж шүүж амжихгүй учраас хүлээлгэж чирэгдүүлэхгүйн тулд лавлагаа гарах өдрөө ирж аваа гээд явуулж байгаа.

- Танайхаас нэг л хүн материал хүлээж авч байгаа юм байна. Лавлагаа олгож байгаа хэдэн хүн байна вэ?

- Хүний хүрэлцээ муу байгаа учраас бид хүч нэмэгдүүлээд боломжийн хэрээр ажиллаж байна. Лавлагаа олгох цонхон дээр 6 хүн ажиллаж байгаа. Манай бүх ажилтан үйлчлэгч гэлтгүй  өөрийнхөө хийх ёстой ажлаа хойш нь тавиад лавлагаа шүүх, материал авах, олгох ажилд дайчлагдаад байна. Бид төрийн, тэр дундаа хууль хүчний байгууллага гэдэг утгаараа дайчилгааны журмаар илүү цагаар ажиллаж байгаа гэдгийг хүмүүс ойлгох хэрэгтэй.

Ярилцсан Б.Цолмонтуяа