Өнөөдөр Барилга хот байгуулалтын яам, Шударга өрсөлдөөн хэрэглэгчийн төлөө газар хамтран орон сууцны 8 хувийн зээлтэй холбогдуулан орон сууцны үнэ өссөн эсэх талаар мэдээлэл хийлээ.

Барилга, хот байгуулалтын яамны ТНБДарга Р.Эрдэнэбүрэн:

-         Орон сууцны 8 хувийн зээл олгож эхэлсэнтэй холбогдуулан орон сууцны үнэ өслөө гэсэн мэдээлэл их гарах болсон. Тиймээс  БХБЯамнаас барилгын компаниудад үнийн судалгаа хийлээ. Юуны өмнө үнэ тогтворжуулах хөтөлбөрийн урьдач нөхцөлийг хангах дэд хөтөлбөрийн талаар товчхон мэдээлэл хүргэе. Монгол банктай хамтраад барилгын гол нэрийн материал буюу цемент, арматурын үнийг тогтворжуулах үүднээс барилгын материал импортлогч аж ахуйн нэгжүүдэд хөнгөлөлттэй зээл олгож эхэлсэн. Энэ зээлэнд нийтдээ 60 орчим компани хамрагдсан. Одоогийн байдлаар барилгын материалын үнэ ханш өмнөх жилүүдтэй харьцуулахад тогтвортой байж чадаж байгаа. Жишээлэхэд цемент нэг тонн нь 130.000-140.000 төгрөг байгаа бол арматур нэг тонн нь 1.140.000 төгрөг байна. Энэ жил нийтдээ сая тонн цемент, 100.000 орчим тонн арматур хэрэглэх тооцоо бий. Үүнээс 660.000 орчим тонн цемент, арматурын 60 орчим хувийг оруулж ирээд байна.

Мөн баригдаж дуусаагүй барилгуудад хөнгөлөлттэй зээл олгосон. 250 гаруй барилгын компанитай уулзаж ярилцаад, зээл авах шаардлагатай компаниудын судалгааг Монгол банкинд хүргүүлсэн. Нийтдээ дээрх компаниудад 900 тэрбум төгрөгийн санхүүжилт шаардлагатай юм билээ. Эдгээрээс  60-70 компанид 230 тэрбум төгрөгийн зээл олгоод байна. Бид эдгээр компаниудад гэрээний үүргээ биелүүлж байгаа эсэхэд шалгалт хийж байгаа.  Ингээд нийлүүлэлт хангалттай байна гэж үзсэн учраас ипотекийн зээлийн журмаа батласан. Харин зээл олгож эхэлснээс үүдэж орон сууцны үнэ өслөө гэсэн гомдол гарах боллоо. Иймээс бүх барилгын компаниудад орон сууцны үний судалгаа хийж үзэхэд хүмүүсийн яриад байгаа шиг огцом өссөн гэж харагдахгүй байгаа. Нийтдээ 19 компани үнээ жаахан нэмсэн, 11 компани бууруулсан байна. Хуучин орон сууцны хувьд үнэ нь буурч байгаа тухай  мэдээлэл ирж байна.

ШӨХТГ-ын дарга О.Магнай:

-         8 хувийн зээл олгож эхэлснээс хойш иргэдээс манайд хандаж барилгын компаниуд орон сууцны үнийг зохиомлоор  өсгөөд байна гэсэн санал гомдол маш их ирэх болсон. Үүнтэй холбогдуулж 80 метр квадратаас доош талбайтай, Улаанбаатар хотод баригдаж байгаа 56 барилгад шалгалт хийхэд 7 компани үнээ 100.000-150.000 төгрөгөөр нэмсэн нь тогтоогдсон. Өнөөдрийн байдлаар сонин хэвлэл дээр бичээд байгаа шиг үнээ илт нэмсэн юм  алга байна. Хэрвээ энэ \ипотекийн зээлийн\ хөтөлбөрт хамрагдсан барилгын компаниуд үндэслэлгүй үнээ нэмсэн тохиолдол гарвал цаашид Засгийн газраас тухайн компанитай дахин хамтарч ажиллахгүй, хуулийн хүрээнд хариуцлага тооцох болно. Энэхүү зээлийн асуудлыг сонгуультай хольж хутгаж, орон сууцны үнэ өсөөд байгаа юм шиг, энэ хөтөлбөр хэрэгжих боломжгүй мэт яриад байгаа нь хий хоосон улс төржилт гэж хэлмээр байна. Өнөөдрийн байдлаар дээрх 7 компани хэлэлцэж тохироод үнээ өсгөсөн асуудал байхгүй,  цаашид хөтөлбөр журмын дагуу хэрэгжээд явна. Харин үнэхээр үнээ өсгөөд, асуудал үүсгээд байгаа барилгын компани байгаа бол иргэд манай газарт хандаж болно. Бид эдгээр компаниудад шалгалт хийхдээ бүх зүйлийг нарийн тооцож байж үнээ нэмсэн үгүйг тодруулсан. Ченжүүд зээлээр далимдуулж орон сууц олноор авна гэсэн болгоомжлол иргэдийн дунд бий. Гэхдээ энэ жил нийтдээ 34.000 орчим орон сууц шинээр ашиглалтанд орох юм билээ. Нийлүүлэлт ийм хангалттай  байгаа учраас орон сууцны үнэ өснө гэж санаа зоволтгүй.

Сэтгүүлч Б.Цолмонтуяа