Ашиглалтын шаардлага хангахгүй 535 орон сууцны барилга нийслэлд байгаа гэсэн жагсаалт гараад байсан.  Эдгээрээс 210 барилгыг хүчитгэн ашиглаж болно гэж Орон сууцны шинэ хотхон хорооллыг барих, ашиглалтын шаардлага хангахгүй орон сууцны барилгыг дахин төлөвлөх ажлыг зохион байгуулах үүрэг бүхий ажлын хэсгийн хуралдаанаар яригдлаа. Харин 325 орон сууцыг буулган , дахин төлөвлөлтөнд оруулах шаардлагатай гэсэн дүгнэлт гарсан байна.

         1965-1980 оны хооронд баригдсан том хавтгаалжин угсармал барилгуудыг хүчитгэвэл 6-7 баллын газар хөдлөлтийг тэсвэрлэнэ гэж мэргэжлийн байгууллагынхан хэлж байна.  Чулуут бетон суурь, тоосгон хана, модон ба төмөр бетон хучилтан бүтээц бүхий барилгууд газар хөдлөлтөнд тэсвэргүй болох нь тогтоогджээ. Эдгээр нь 40, 50 мянгат болон бага тойрог, таван шарын барилгууд юм.

       Сүүлийн үед баригдаж байгаа орон сууцны зориулалттай төмөр бетон араг бүтээцтэй барилгуудад газар хөдлөлтийн тэсвэрлэлтийн үнэлгээ хийхэд дийлэнхи нь тэсвэртэй гэж үнэлэгджээ.   Орон нутагт ашиглалтын шаардлага хангахгүй нийтийн зориулалттай орон сууцны барилгуудын дүнг Барилгын  хөгжлийн төвөөс нэгтгэсэн байна.

Архангай аймагт 19, Баянхонгорт 9, Булганд 5, Говь-Алтай 3, Дундговьд 46, Дорнод аймагт 7, Өмнөговьд 10, Сүхбаатарт 4, Сэлэнгэ 14, Төв 20, Өвөрхангай 5, Орхон 9, Ховд 6, Увс 5, Говьсүмбэр 5, Баян-Өлгийд 4 ашиглах боломжгүй барилга байгаа гэсэн мэдээлэл ирүүлжээ.

   Улаанбаатар хотод угсармал байшингуудын дулаан алдагдлыг бууруулахад 470 тэрбум төгрөг шаардлагатай гэсэн тооцоо гарсан байна.  Хэрвээ ингэж чадвал дулаан эрчим хүчний одоогийн хэрэглээг 30 дахин бууруулах боломжтой гэнэ.   Нийтийн зориулалттай орон сууцны барилгын дулаан алдагдлыг бууруулах чиглэлээр хэрэгжүүлэх төслийг хэрхэн яаж хэрэгжүүлэх, санхүүжилтийн асуудлыг шийдвэрлэх асуудлаар яам, нийслэл, монголын барилгачдын холбоо хамтарч ажиллахаар яригдсан байна.

      Ашиглалтын шаардлага хангахгүй орон сууц, газар хөдлөлтөнд тэсвэргүй хуучин барилгыг буулган шинэчлэх ажлын  явц үр дүн муутай байгаа нь ашиглалтын шаардлага хангахгүй орон сууцыг шинэчлэн  барилгажуулах тухай хууль эрх зүйн зохицуулалт  дутмаг, шинээр боловсруулагдан гарч байгаа хууль, түүнийг даган гарсан дүрэм, журам, зааврууд хоорондоо зөрчилддөг. Түүнчлэн дахин төлөвлөх, барилгажуулах төслийн талаар оршин суугчдын мэдлэг ойлголт дутмаг, оршин суугчдын хоорондох эв нэгдэл, нийтийн эрх ашгийн төлөөх нэгдмэл санаа байхгүйтэй холбоотой гэнэ.

Цаашид Хууль эрх  зүйн орчинг шинэчлэх, хуучин мөрдөж байсан тушаалыг хүчингүй болгох эсвэл нэмэлт өөрчлөлт оруулах, шинээр боловсруулж байгаа “Хот дахин хөгжүүлэх тухай” хуульд ашиглалтын шаардлага хангахгүй, газар хөдлөлтөнд тэсвэргүй барилгуудыг буулгах, шинэчлэн барилгажуулах зохицуулалтыг тусгахаар болсон байна.