Төрийн ордонд болсон "Шинэчилж шийдье -222"хэлэлцүүлэгийн үеэр иргэдэд хүлээлт үүсгээд байсан орон сууцны жилийн 8%-ийн хүүтэй зээлийн талаарх мэдээллийг хийсэн.

      Сайны хажуугаар саар гэгчээр бага хүүтэй зээлийн сургаар орон сууцны үнэ өсчих вий гэсэн таамаглал олон нийтэд байгаа.

    Тэгвэл Засгийн газраас ийм нөхцөл байдал үүсгэхгүйн тулд барилгын салбарын бүтээгдэхүүн үйлдвэрлэл, импортлогч нар болон орон сууц барьдаг компаниудад зориулж их хэмжээний зээл гарган нийлүүлэлт талаа дэмжээд байна.

    Тодруулбал, хөтөлбөр эхлэхээс өмнө гэхэд барилгын салбарт 800 гаруй тэрбум төгрөгний санхүүжилт хийгдсэн. Харин Монголбанк, Засгийн газар дахин 380 тэрбум төгрөгийг зөвхөн орон сууц барьдаг компаниудад олгосноор нийлүүлэлт тал дахь инфляцийн хөөрөгдлийг намжааж чадсан гэж үзэж буйгаа өнөөдрийн хэлэлцүүлгийн үеэр ярьсан юм.

    Харин Монголбанкны Ерөнхий эдийн засагч С.Болд "Орон сууцны м²-ийн үнийг тогтоох боломжгүй. Харин бид нийлүүлэлт талыг дэмжсэнээр зохисгүй үнийн өсөлт үүсэхгүй байх боломжийг бүрдүүлж өгсөн. М²-ийн үнийг жишээ нь 1,2 сая төгрөгөөр зар гэдэг шаардлагыг тавих нь барилгын чанарт сөрөг нөлөөтэй юм" гэлээ. Мөн 8%-ийн хүүтэй зээлийн эргэн төлөлт сард орлогын 45 хувиас хэтрэхгүй гэсэн заалтыг оруулж өгсөн юм.

     2013 оны байдлаар барилгын салбарт 1 их наяд төгрөгний санхүүжилтийг хийгээд байна, шаардлагатай бол дахиад ч мөнгө гаргахад бэлэн. Зах зээлийн зарчмаар нийлүүлэлт талдаа эхлээд дорвитой анхаарсан учраас орон сууцны үнийн өсөлтийн тал дээр асуудал үүсэхгүй гэдгийг Монгол банкны ерөнхийлөгч Н.Золжаргал онцолсон юм.