Төв аймгийн Сэргэлэн сумын Хөшигийн хөндийд барих олон улсын нисэх буудлын төсөл хэрэгжих шатандаа орлоо. Монголын агаарын тээврийн салбарыг олон улсад өрсөлдөхуйц хэмжээнд хүргэх нисэхийн шинэ буудлыг 2016 онд ашиглалтад оруулахаар төлөвлөжээ.

         Чингис хаан нисэх буудлаар дамжинжилд сая гаруй хүн зорчдог бол Хөшигийн хөндийд баригдах буудал жилд 3 сая зорчигч хүлээн авна. Мөн цаг агаарын тааламжгүй байдал, салхины чиглэлээс үл хамааран хоёр талдаа буух, хөөрөх зурвастай тул 24 цагийн турш онгоц хүлээж авах юм байна.Нисэх онгоцны шинэ буудлын цогцолборт 3600 м урт, 46 м-ийн өргөнтэй онгоц хөөрч, буух төмөр бетон зурвас, 37000м²талбайтай, хүнд даацын 250-350 суудалтай Боинг, Аэробус онгоц хүлээн авах 6 хүзүүвчтэй зорчигч үйлчилгээний барилга, 43 метрийн өндөртэй нислэгийн хөдөлгөөн удирдлагын цамхаг бие даасан дулаан хангамжийн уурын зуух, цэвэр усны хангамж, бохир ус цэвэрлэх байгууламж зэрэг 30 гаруй барилга байгууламжаас бүрдэж байна.

Мөн шатахуун сумалгааны гидрант систем, хөөрч буух зурвасны голын тэнхлэгийн гэрэл, радио холбоо, агаарын навигацийн иж бүрэн тоног төхөөрөмж бүхий орчин үеийн нисэх буудалд байдаг цогц систем бүхий нисэх буудал болохгэнэ.  Ингэснээр шинэ нисэх буудал жилд 3 сая зорчигч хүлээж авах бөгөөд цаашдаа жилд 12 сая зорчигч хүлээн авах боломж бүхий 20 хүзүүвч болгон өргөтгөх, нэмж хөөрч буух зурвас барих зай талбайг тооцон төлөвлөжээ.

       Япон Улсын Засгийн газраас энэ төслийг хэрэгжүүлэхэд жилийн 0,2 хувийн хүүтэй, 40 жилийн хугацаатай 28 тэрбум 807 сая иенийн зээл олгох гэрээ байгуулсныг УИХ дэмжсэн юм. Энэ зээлийн давуу тал нь эхний 10 жилд төлбөрөөс чөлөөлөн сүүлийн 30 жилд жилийн 0,2 хувийн хүүтэй буцаан төлөх нөхцөлтэй тул улсын төсөвт ямар нэгэн дарамт үүсэхгүй, хамгийн үр ашигтай зээл гэж үзэж байна.

Манай зүгээс төслийг хэрэгжүүлэхэд онцгой анхаарч шинэ нисэх буудлын дэд бүтэц болох цахилгаан эрчим хүчээр хангах 110 кВ-ын цахилгаан дамжуулах шугам, хурдны авто зам, холбоо мэдээллийн шилэн кабель, үерийн усны хамгаалалтын далангийн барилга, байгууламжуудыг өөрийн хөрөнгөөр Монгол барилгачдаараа барьж байгуулах ажээ.

Түүнчлэн шинэ нисэх буудал баригдсанаар 100 мянга орчим хүн амтай дагуул хот шинээр бий болж, 3000 гаруй тогтмол ажлын байр бий болох  гэнэ.